ന്യൂഡല്ഹി: ഡല്ഹിയില് യുവതിയുടെ മരണത്തില് ഞെട്ടിക്കുന്ന വെളിപ്പെടുത്തലുമായി ദൃക്സാക്ഷി. പെണ്കുട്ടിയെ ഒന്നരമണിക്കൂര് റോഡിലൂടെ വലിച്ചിഴച്ചെന്ന് ദൃക്സാക്ഷി ദീപക് ദഹിയ പറഞ്ഞു. ഇന്നലെ പുലര്ച്ചെ 3.20 ഓടെയായിരുന്നു അപകടം. സ്കൂട്ടറില് പോയ ഇരുപതുകാരിയാണ് അപകടത്തില് മരിച്ചത്. വലിയൊരു ശബ്ദം കേട്ടാണ് നോക്കിയത്. വാഹനത്തിന്റെ ടയര് പൊട്ടിയതായിരിക്കുമെന്നാണ് കരുതിയത്. എന്നാല് കണ്ടത് നടുക്കുന്ന കാഴ്ചയാണ്. വാഹനത്തില് കുരുങ്ങിയ പെണ്കുട്ടിയുമായി ഒരു കാര് കുതിച്ചു പായുന്നു. സംഭവം കണ്ടയുടന് തന്നെ പൊലീസിനെ വിവരം അറിയിച്ചെന്നും അപകടം നടന്ന കഞ്ജ് വാലയില് ബേക്കറി ഷോപ്പ് നടത്തുന്ന ദീപക് ദഹിയ പറഞ്ഞു.
കുറേസമയത്തിനുശേഷം കാര് തിരികെ വന്നപ്പോഴും കാറില് പെണ്കുട്ടിയുടെ മൃതദേഹമുണ്ടായിരുന്നു. പ്രതികള് 4-5 കിലോമീറ്റര് റോഡില് യുടേണ് എടുത്ത് ആവര്ത്തിച്ച് വാഹനമോടിച്ചതായി ദഹിയ പറഞ്ഞു. വാഹനം തടഞ്ഞു നിര്ത്താന് പലവട്ടം താന് ശ്രമിച്ചു. എന്നാല് പ്രതികള് വാഹനം നിര്ത്തിയില്ല. ബൈക്കില് താന് വാഹനത്തിന് പിന്നാലെ പാഞ്ഞു. ഒന്നര മണിക്കൂറിന് ശേഷം പെണ്കുട്ടിയുടെ മൃതദേഹം ജ്യോതി ഗ്രാമത്തിന് സമീപം താനേ കാറില് നിന്നും താഴെ വീഴുകയായിരുന്നു. അതിനുപിന്നാലെ പ്രതികള് വാഹനവുമായി സ്ഥലത്തു നിന്നും മുങ്ങി. ഇത് വെറുമൊരു വാഹനാപകടമാണെന്ന് കരുതാനാകില്ലെന്നും ദീപക് ദഹിയ പറയുന്നു. പുതുവത്സരാഘോഷങ്ങള്ക്കിടെയാണ് സംഭവം.
കാറില് കുരുങ്ങിയ യുവതിയെ 1.5 മണിക്കൂറോളം പ്രതികള് റോഡിലൂടെ വലിച്ചിഴച്ചെന്നു ദൃക്സാക്ഷിയായ കടയുടമ ദീപക് ദഹിയ പറഞ്ഞു. നിര്ത്താന് ആവശ്യപ്പെട്ടെങ്കിലും പ്രതികള് കേട്ടില്ലെന്നും കാര് ഓടിച്ചു മുന്നോട്ടു പോയെന്നും യു-ടേണ് എടുത്തെന്നും ദീപക് വ്യക്തമാക്കി. പുലര്ച്ചെ 3.24ന് ആണ് പൊലീസ് കണ്ട്രോള് റൂമില് ആദ്യവിവരം ലഭിച്ചത്. യുവതിയുടെ മൃതദേഹം റോഡില് കിടക്കുന്നതായി 4.11ന് അടുത്ത ഫോണ് വന്നു. തുടര്ന്നാണു പരിശോധന ശക്തമാക്കിയത്. അപകടത്തെപ്പറ്റി അറിഞ്ഞില്ലെന്നു പ്രതികള് ചോദ്യം ചെയ്യലില് ആദ്യം പൊലീസിനോടു പറഞ്ഞു. അപകടമുണ്ടായെന്നും യുവതിയെ വലിച്ചിഴച്ചില്ലെന്നും പിന്നീടു മൊഴി നല്കി.
യുവതിയെ ഇടിച്ചശേഷം കടന്നുകളയാനാണു പ്രതികള് ശ്രമിച്ചതെന്നാണു പൊലീസിന്റെ വിലയിരുത്തല്. യുവതിയും പ്രതികളും തമ്മില് എന്തെങ്കിലും ഇടപാടുണ്ടോയിരുന്നോ എന്നും അന്വേഷിക്കുന്നുണ്ട്. വസ്ത്രങ്ങളില്ലാതെയാണു യുവതിയുടെ മൃതദേഹം കണ്ടെത്തിയതെങ്കിലും പീഡനം നടന്നിട്ടില്ലെന്നാണു നിഗമനമെന്നു ഡിസിപി ഹരേന്ദ്ര കെ.സിങ് വ്യക്തമാക്കി. സംഭവത്തില് ഞെട്ടല് രേഖപ്പെടുത്തിയ ഡല്ഹി വനിതാ കമ്മിഷന് അധ്യക്ഷ സ്വാതി മാലിവാള്, സത്യം പുറത്തുവരണമെന്ന് ആവശ്യപ്പെട്ടു. ഡല്ഹി പൊലീസിനു സ്വാതി നോട്ടിസ് അയച്ചു.