കുമളി: എംഡിഎംഎ മയക്കുമരുന്നടക്കം കൈയ്യില്‍ വച്ച അഞ്ചംഗ സംഘം പിടിയില്‍. ബെംഗളൂരുവില്‍ നിന്നും എംഡിഎംഎ മയക്കുമരുന്നും കഞ്ചാവുമായി എത്തിയ സ്ത്രീ ഉള്‍പ്പെടെയുള്ള അഞ്ചംഗ സംഘമാണ് പിടിയിലായത്. ഇടുക്കി വണ്ടിപ്പെരിയാറിനു സമീപത്തു വച്ചാണ് ഇവരെ എക്സൈസ് പിടികൂടിയത്.
കുമളി അതിര്‍ത്തി ചെക്ക് പോസ്റ്റില്‍ പരിശോധനക്കായി കൈകാണിച്ചിട്ടും വാഹനം നിര്‍ത്താതെ പോയ സംഘത്തെ പിന്തുടര്‍ന്നാണ് പിടികൂടിയത്. തിരുവനന്തപുരം സ്വദേശികളായ ഡൈന, വിജേഷ്, നിതീഷ്, കിരണ്‍, പ്രകോഷ് എന്നിവരാണ് പിടിയിലായത്. ഇവരുടെ പക്കല്‍ നിന്നും രണ്ടര ഗ്രാം എംഡിഎംഎയും 100 ഗ്രാം കഞ്ചാവും പിടികൂടി.
അതേസമയം ഇവര്‍ സഞ്ചരിച്ച വാഹനം അറുപത്തി മൂന്നാം മൈലിലെ പെട്രോള്‍ പമ്ബില്‍ ഇടിച്ചു കയറ്റി തിരിക്കാന്‍ ശ്രമിച്ചതിനെ തുടര്‍ന്ന് ടയര്‍ പഞ്ചറായി. ഈ വാഹനവും കസ്റ്റഡിയിലെടുത്തു. ബെംഗളൂരുവില്‍ നിന്നാണ് എംഡിഎംഎ വാങ്ങിയതെന്നാണ് സംഘാംഗങ്ങള്‍ മൊഴി നല്‍കിയത്.
