വന്യമൃഗങ്ങള് തമ്മിലുള്ള വേട്ടയാടലിന്റെ നിരവധി ദൃശ്യങ്ങള് നാം കണ്ടിട്ടുണ്ട്. എന്നാല് ചിലതൊക്കെ കാണുമ്ബോള് സഹതാപവും പേടിയുമൊക്കെ തോന്നുമെങ്കിലും മറ്റുചില വീഡിയോകള് കാണികളെ വളരെയധികം ത്രില്ലടിപ്പിക്കാറുണ്ട്.ഏതായാലും അത്തരത്തിലൊരു വീഡിയോയാണ് ഇപ്പോള് നെറ്റീസണ്സിനിടയില് ശ്രദ്ധ നേടുന്നത്.
ബോട്സ്വാനയിലെ ഷോബേ ദേശീയോദ്യാനത്തില് ഒരുകൂട്ടം കാട്ടുനായകള് ചേര്ന്ന് പുള്ളിപ്പുലിയെ ആക്രമിക്കുന്നതിന്റെ ദൃശ്യങ്ങളാണിത്.വനത്തിനുള്ളിലൂടെ സഫാരി നടത്തുന്നതിനിടെ സ്ടു പോര്ട്ടര് എന്ന വ്യക്തിയാണ് താന് കണ്ട കൗതുകകരമായ കാഴ്ച ക്യാമറയില് പകര്ത്തിയിരിക്കുന്നത്. കാട്ടുനായകള് അധിവസിക്കുന്ന ഒരു മേഖലയിലൂടെ സഞ്ചരിക്കുകയായിരുന്നു സ്ടുവും സംഘവും. അവിടെ എത്തിയപ്പോഴാകട്ടെ നായകള് കൂട്ടമായി വിശ്രമിക്കുന്ന കാഴ്ചയാണ് കണ്ടത്. എന്നാല് കൂട്ടത്തില് ഒന്നുമാത്രം സമീപത്തുള്ള ഒരു മരത്തിലേക്ക് സസൂക്ഷ്മം നോക്കി നില്ക്കുന്നു. മരത്തിന് മുകളിലാകട്ടെ ഒരു പുള്ളിപ്പുലിയും.
തങ്ങളുടെ കൂട്ടത്തിലുണ്ടായ നായ്ക്കുട്ടിയെ ആക്രമിച്ചു കൊന്ന പുള്ളിപ്പുലിയോട് പ്രതികാരം ചെയ്യാനായി കാത്തു കിടക്കുകയായിരുന്നു നായ്ക്കൂട്ടം. ഇരതേടാന് പോയ സമയം കുഞ്ഞിനെ പുള്ളിപ്പുലി കൊലപ്പെടുത്തുകയായിരുന്നു. പ്രത്യാക്രമണം ഭയന്ന് മരത്തില് കയറിയ പുലി പതുക്കെ താഴെയിറങ്ങി രക്ഷപ്പെടാന് നോക്കിയെങ്കിലും നായ്ക്കൂട്ടം വളഞ്ഞു. നാലുപാടുനിന്നും നായകള് ആക്രമിച്ചതോടെ ഗത്യന്തരമില്ലാതെ വീണ്ടും പുലി മരത്തിനു മുകളില് തന്നെ അഭയം പ്രാപിച്ചു.
ഏതായാലും ഒടുവില് എത്രയൊക്കെ ശ്രമിച്ചിട്ടും തനിച്ച് പ്രതിരോധിക്കാനാകില്ലെന്ന് മനസ്സിലാക്കിയ പുലി തോല്വി സമ്മതിച്ച് തറയില് കിടന്നു. മുന്പ് ഉണ്ടായത്ര ആക്രമണം ഇത്തവണ നായ്ക്കളുടെ ഭാഗത്തുനിന്നും ഉണ്ടായില്ല. അവര് പിന്തിരിഞ്ഞതോടെ പുലി തന്റെ ജീവനുകൊണ്ട് ഓടി രക്ഷപ്പെട്ടു. നിരവധി ആളുകളാണ് ഇതിനോടകം വീഡിയോ കണ്ടത്.
