വാഹനങ്ങൾ നിറഞ്ഞോടുന്ന ഹൈവേയിലേക്ക് ഒരു ജെറ്റ് വിമാനം ക്രഷ്ലാൻഡ് ചെയ്ത് കത്തിയമരുന്ന വീഡിയോ പുറത്ത്; ഞെട്ടിക്കുന്ന അപകടത്തിന്റെ ദൃശ്യങ്ങൾ ഇവിടെ കാണാം.
നിങ്ങള്‍ ഒരു ഹൈവേയിലൂടെ കാർ ഓടിച്ചു പോവുകയാണ് എന്ന് കരുതുക. പെട്ടെന്ന് റോഡിലേക്ക് ഒരു വിമാനം വന്നിറങ്ങിയാല്‍ എങ്ങനെയിരിക്കും? അതുണ്ടാക്കുന്ന അപകടം എത്രമേല്‍ വലുതായിരിക്കും? അത്തരം ഒരു സംഭവമാണ് അമേരിക്കയിലെ ഫ്ലോറിഡയില്‍ അടുത്തിടെ നടന്നത്.
ഒരു ബൊംബാർഡിയർ ചലഞ്ചർ 600 ബിസിനസ് ജെറ്റാണ് രണ്ട് എഞ്ചിനുകളും പ്രവർത്തന രഹിതമായതിനെ തുടർന്ന് കഴിഞ്ഞയാഴ്ച ഫ്ലോറിഡയിലെ നേപ്പിള്‍സിലെ ഐ-75 ഹൈവേയില്‍ തകർന്നു വീണത്. തിരക്കേറിയ അന്തർസംസ്ഥാന പാതയായ 75-ല്‍ വിമാനം ഇടിച്ചിറങ്ങിയതിനെ തുടർന്ന് രണ്ട് പൈലറ്റുമാരും കൊല്ലപ്പെട്ടു. ആ വഴികളില്‍ യാത്ര ചെയ്തിരുന്ന ഒരു കാറിന്റെ ഡാഷ് ക്യാമില്‍ ഈ നടുക്കുന്ന ദൃശ്യങ്ങള്‍ പതിഞ്ഞിട്ടുണ്ട്.
വിമാനത്തിന്റെ ചിറക് ഒരു കാറിനെ തകർത്തു: ഭിത്തിയില്‍ ഇടിച്ച്‌ തീപിടിക്കുന്നതിന് മുമ്ബ് വിമാനം റോഡിന് കുറുകെ തെന്നിമാറുന്നത് വീഡിയോയില്‍ കാണാം. ഭിത്തിയില്‍ ഇടിക്കുന്നതിന് മുമ്ബ് വിമാനം റോഡരികിലെ രണ്ട് കാറുകളില്‍ ഇടിക്കുകയായിരുന്നുവെന്ന് ദൃക്സാക്ഷികള്‍ പറഞ്ഞു.”വിമാനം ഞങ്ങളുടെ തലയ്ക്ക് മുകളില്‍ ഒരു ഇഞ്ച് പൊക്കത്തില്‍ ആയിരുന്നു,” ബ്രിയാന വാക്കർ അസോസിയേറ്റഡ് പ്രസ്സിനോട് പറഞ്ഞു. “ഞങ്ങളുടെ മുന്നിലുള്ള കാറില്‍ നിന്ന് ഞങ്ങളെ വേർപെടുത്തിയത് നിമിഷങ്ങളുടെ അകലം മാത്രമാണ്. വിമാനത്തിന്റെ ചിറക് ഒരു കാറിനെ തകർത്തു.”
മരിച്ച പൈലറ്റ്മാർ ഫ്ലോറിഡയിലെ ഓക്ലാൻഡ് പാർക്കിലെ എഡ്വേർഡ് ഡാനിയല്‍ മർഫി (50), ഇയാൻ ഫ്രെഡറിക് ഹോഫ്മാൻ (65) എന്നിവർ ഫ്ലോറിഡയിലെ പോംപാനോ ബീച്ചില്‍ നിന്നുള്ളവരാണ്. വിമാനത്തിലുണ്ടായിരുന്ന മറ്റ് മൂന്ന് പേർ രക്ഷപ്പെട്ടു. ഒഹായോയിലെ കൊളംബസില്‍ താമസിക്കുന്ന ആരോണ്‍ ബേക്കർ (35), ഓദ്ര ഗ്രീൻ (23) എന്നിവർക്കൊപ്പം ഫ്ലോറിഡയിലെ ജൂപ്പിറ്ററില്‍ നിന്നുള്ള ഒരു ക്രൂ അംഗം, സിഡ്നി ആൻ ബോസ്മാൻസുമാണ് (23) രക്ഷപ്പെട്ടത്.ബൊംബാർഡിയർ ചലഞ്ചർ 600 ബിസിനസ്സ് ജെറ്റ്, കൊളംബസ്, ഒഹായോ, വിമാനത്താവളത്തില്‍ നിന്ന് ഉച്ച തിരിഞ്ഞ് നേപ്പിള്‍സ് വിമാനത്താവളത്തിലേക്ക് പുറപ്പെട്ടു. തകർന്നു വീഴുമ്ബോള്‍ വിമാനം ലക്ഷ്യത്തില്‍ നിന്നും ഏതാനും മൈലുകള്‍ അകലെയായിരുന്നു.
