സ്വകാര്യ വിദേശ സർവകലാശാലകള്‍ സംബന്ധിച്ച ബജറ്റ് പ്രഖ്യാപനത്തില്‍ എസ്‌എഫ്‌ഐക്കെതിരെ വിമർശനവുമായി കെഎസ്യു. വിദ്യാഭ്യാസ മേഖലയിലെ സ്വകാര്യവല്‍ക്കരണത്തില്‍ എസ്എഫ്ഐ പഴയ നിലപാട് മാറ്റിയോ എന്ന് കെഎസ്യു സംസ്ഥാന ഉപാധ്യക്ഷ ആൻ സെബാസ്റ്റ്യൻ ചോദിച്ചു.
എസ്എഫ്ഐ പണ്ട് ചെയ്തതൊക്കെ തെറ്റാണെന്ന് സമ്മതിക്കണമെന്നും അല്ലെങ്കില്‍ പുതിയ നിലപാട് തുറന്നു പറയണമെന്നും ആൻ സെബാസ്റ്റ്യൻ ഫേസ്ബുക്ക് കുറിപ്പില്‍ ആവശ്യപ്പെട്ടു. ടി പി ശ്രീനിവാസന് കൊടുത്തത് പോലെ ബാലഗോപാലിന് കൊടുത്തിട്ട് എസ്‌എഫ്‌ഐയുടെ ചരിത്രം ഓർമ്മിപ്പിക്കണമെന്ന് പറഞ്ഞ ആനിന്റെ പോസ്റ്റിൽ കൂത്തുപറമ്ബ് സമരവും പരാമർശിച്ചു.
ഫേസ്ബുക്ക് പോസ്റ്റ്:
പുഷ്പനെ അറിയാമോ ഞങ്ങടെ പുഷ്പനെ അറിയാമോ ….സഖാവിനെ അറിയാമോ …ആ രണഗാഥ അറിയാമോ ….സ്വകാര്യ – വിദേശ സർവകലാശാലകളുടെ കാര്യത്തില്‍ ഇടത് സർക്കാരിന്റെ നിലപാട് കേട്ടപ്പോള്‍ കെഎൻ ബാലഗോപാല്‍ ഉള്‍പ്പടെയുള്ള മൂത്തസഖാക്കളോടും ആർഷോ ഉള്‍പ്പടെയുള്ള കുട്ടിസഖാക്കളോടും കേരളക്കര മുഴുവൻ ചോദിക്കുന്ന ചോദ്യം ഇത് തന്നെയാണ്
കെവി റോഷൻ , കെകെ രാജീവൻ , മധു , കെ ഷിബുലാല്‍ , സി ബാബു … ഈ അഞ്ച് രക്തസാക്ഷികളെ ഓർമ്മയുണ്ടോ ???… കൂത്തുപറമ്ബ് സമരം എന്തിനായിരുന്നു എന്ന് എസ്എഫ്ഐ , ഡിവൈഎഫ്‌ഐ നേതൃത്വത്തിന് അറിയാമോ ???… 2016 ജനുവരി – ഉന്നത വിദ്യാഭ്യാസ കൗണ്‍സില്‍ വൈസ് ചെയർപേഴ്സണ്‍ ആയിരുന്ന ടിപി ശ്രീനിവാസനെ കോവളത്ത് നടന്ന ആഗോള വിദ്യാഭ്യാസ സംഗമത്തില്‍ പങ്കെടുക്കാൻ എത്തിയപ്പോള്‍ എസ്എഫ്ഐ പ്രവർത്തകർ അടിച്ചുവീഴ്ത്തി … വിദ്യാഭ്യാസത്തിന്റെ സ്വകാര്യവത്കരണത്തിനും കച്ചവടത്തിനുമെതിരെ പ്രതിഷേധിക്കുന്ന എസ്‌എഫ്‌ഐക്കാർക്കിടയിലേക്ക് കടന്നുചെന്ന ശ്രീനിവാസന്റെ നടപടിയാണ് പ്രശ്നം എന്ന എം സ്വരാജിന്റെ അന്നത്തെ പ്രതികരണം ഇത്തരുണത്തില്‍ പ്രത്യേക പരാമർശം അർഹിക്കുന്നുണ്ട് …
ഒന്നുകില്‍ എസ്എഫ്ഐ നേതൃത്വം പണ്ട് ചെയ്തതും പറഞ്ഞതുമൊക്കെ തെറ്റാണെന്ന് സമ്മതിക്കണം … അല്ലെങ്കില്‍ മാറിയ കാലത്തിനനുസരിച്ച്‌ നിലപാട് പുതുക്കി എന്ന് തുറന്ന് സമ്മതിക്കണം … ഇത് രണ്ടും പറ്റില്ലെങ്കില്‍ പണ്ട് ടിപി ശ്രീനിവാസന് കൊടുത്തത് പോലെ ഒരെണ്ണം ബാലഗോപാല്‍ സഖാവിന് കൊടുത്തിട്ട് എസ്‌എഫ്‌ഐയുടെ ചരിത്രം ഓർമിപ്പിക്കുകയെങ്കിലും വേണം …
പുഷ്പനെ അറിയാമോ ഞങ്ങടെ പുഷ്പനെ അറിയാമോ …. സഖാവിനെ അറിയാമോ … ആ രണഗാഥ അറിയാമോ …. സ്വകാര്യ – വിദേശ…
Posted by Ann Sebastian on Monday, 5 February 2024
