ഗുരുതര സാമ്പത്തിക പ്രതിസന്ധി; കടമെടുപ്പ് പരിധി തീരുന്നു; കേന്ദ്രം കനിഞ്ഞില്ലെങ്കിൽ സംസ്ഥാനത്ത് ശമ്പളവും പെൻഷനും വരെ മുടങ്ങുന്ന സാഹചര്യം: തകർച്ചയിലേക്ക് കൂപ്പുകുത്തി കേരളം.

ഓണാവധിക്കു തൊട്ടുപിന്നാലെ സെപ്റ്റംബര്‍ 1 മുതല്‍ ഈ മാസത്തെ ശമ്ബളവും പെൻഷനും വിതരണം ചെയ്യേണ്ടിവരുന്നതാണ് സര്‍ക്കാരിനു മുന്നിലെ പ്രധാന വെല്ലുവിളി. 5,000 കോടി രൂപയിലേറെയാണ് ഒരു മാസം ശമ്ബളവും പെൻഷനും വിതരണം ചെയ്യാൻ വേണ്ടത്. 1,600 കോടിയോളം രൂപ, മുൻപ് കടമെടുത്ത തുകയുടെ പലിശ അടയ്ക്കാൻ വേണം. ദൈനംദിനാവശ്യങ്ങള്‍ക്കും പദ്ധതികള്‍ക്കും മറ്റുമായി വേണ്ടിവരുന്ന ചെലവു വേറെ. ജിഎസ്ടി അടക്കമുള്ള നികുതികള്‍ വഴിയും മറ്റുമുള്ള വരുമാനം കൊണ്ട് ഈ ചെലവുകള്‍ മുഴുവൻ നിറവേറ്റാൻ കഴിയില്ല. 2,000 കോടി രൂപയുടെയെങ്കിലും കുറവാണ് സെപ്റ്റംബറില്‍ സര്‍ക്കാര്‍ പ്രതീക്ഷിക്കുന്നത്.

തിരുവോണ നാളില്‍ 1,300 കോടി രൂപ സര്‍ക്കാര്‍ കടമെടുക്കുന്നുണ്ട്. ഇതില്‍ ഒരു വിഹിതം ശമ്ബള, പെൻഷൻ ചെലവുകള്‍ക്കായി ഉപയോഗിക്കും. കേന്ദ്ര സര്‍ക്കാര്‍ മുൻപ് നല്‍കിയ കണക്കു പ്രകാരം 721 കോടി രൂപയാണ് പിന്നെ കടമെടുക്കാൻ ബാക്കിയുണ്ടാകുക. എന്നാല്‍, കിഫ്ബി നടത്തിയ വായ്പാ തിരിച്ചടവും മറ്റും ചൂണ്ടിക്കാട്ടി 2,000 കോടി രൂപ വരെ കടമെടുക്കാൻ കഴിയുമെന്നു ധനവകുപ്പ് വൃത്തങ്ങള്‍ വ്യക്തമാക്കി.ംകേന്ദ്രം അനുവദിച്ച കടമെടുപ്പുപരിധി അടുത്ത മാസത്തോടെ കടക്കും. പിന്നീട് എന്തു ചെയ്യുമെന്ന വലിയ ആശങ്കയിലാണു ധനവകുപ്പ്.

ശമ്ബളവും പെൻഷനും വരെ മുടങ്ങേണ്ട സാഹചര്യത്തിലേക്കു കാര്യങ്ങള്‍ നീങ്ങാതിരിക്കാൻ കേന്ദ്ര സഹായം തേടി ധനസെക്രട്ടറിയെ അടുത്തയാഴ്ച ഡല്‍ഹിക്ക് അയയ്ക്കുന്നുണ്ട്. അടുത്തിടെ സാമ്ബത്തിക പ്രതിസന്ധി മൂലം സര്‍ക്കാര്‍ വകുപ്പുകളും സര്‍ക്കാര്‍ ധനസഹായം സ്വീകരിക്കുന്ന സ്ഥാപനങ്ങളും സെമിനാര്‍, ശില്‍പശാലകള്‍, പരിശീലന പരിപാടികള്‍ എന്നിവ നടത്താൻ പഞ്ചനക്ഷത്ര സൗകര്യങ്ങള്‍ ഉപയോഗിക്കുന്നത് ഒഴിവാക്കണമെന്ന് ധനവകുപ്പ് നിര്‍ദേശിച്ചിരുന്നു. സാമ്ബത്തിക പ്രതിസന്ധി നിലനില്‍ക്കുന്നതിനാല്‍ ചെലവുകള്‍ ചുരുക്കണമെന്ന് ധനവകുപ്പ് നിര്‍ദ്ദേശം നല്‍കി. നിര്‍ദ്ദേശം ലംഘിച്ചാല്‍ ഉദ്യോഗസ്ഥരില്‍നിന്ന് പലിശസഹിതം ചെലവ് തിരികെ പിടിക്കും.