വൈദേകം എന്ന അധ്യാഡംബര, ആധുനിക ആയുർവേദ റിസോർട്ട്; ഏറ്റവും വലിയ ഓഹരി ഉടമ ഇ പി ജയരാജന്റെ മകൻ ജയ്സൺ: സിപിഎമ്മിനെ പിടിച്ച് ഉലക്കുന്ന ആരോപണങ്ങളുടെ കേന്ദ്രബിന്ദുവായ വിവാദ റിസോർട്ടിനെ കുറിച്ച് വായിക്കാം.

സിപിഎമ്മിനെ ഉലയ്ക്കുന്ന കൊടുങ്കാറ്റ്

സംസ്ഥാന സിപിഎമ്മിലെ ഏറ്റവും മുതിർന്ന നേതാക്കളിൽ ഒരാളാണ് ഇ പി ജയരാജൻ. അദ്ദേഹത്തിന്റെ കുടുംബാംഗങ്ങൾക്കെതിരെ ഉയർന്നിരിക്കുന്നത് കോടികളുടെ അനധികൃത സ്വത്ത് ആരോപണമാണ്. ആരോപണം ഉയർത്തിയിരിക്കുന്നത് പി ജയരാജൻ ആണ്. കണ്ണൂരിലെ അണികൾക്കിടയിൽ ഏറെ സ്വീകാര്യതയുള്ള, പിണറായി ഉൾപ്പെടെയുള്ള നേതാക്കളുടെ അതൃപ്തി കൊണ്ട് പാർട്ടിയിൽ സമീപകാലത്തായി ഒതുക്കപ്പെട്ടിരിക്കുന്ന പി ജയരാജൻ.

ആരോപണം ഉയർത്തിയിരിക്കുന്ന പി ജയരാജന്റെ അഴിമതി രഹിത പശ്ചാത്തലമാണ് പാർട്ടിയെ ഏറെ വെട്ടിലാക്കുന്നത്. എംപി ഗോവിന്ദൻ ഈ ആരോപണങ്ങളെ തള്ളിക്കളഞ്ഞില്ല എന്ന് മാത്രമല്ല രേഖാമൂലം പരാതി നൽകുവാൻ പി ജയരാജൻൺനോട് ആവശ്യപ്പെടുകയും ചെയ്തിരിക്കുന്നു. അതുകൊണ്ടുതന്നെ വരും ദിവസങ്ങളിൽ സിപിഎമ്മിനുള്ളിൽ ഇതുകൊണ്ട് ഉണ്ടാകുന്ന പൊട്ടിത്തെറിയുടെ ആഘാതം എത്രമാത്രം ഉണ്ടാകുമെന്ന് വിലയിരുത്താൻ പോലും സാധ്യമല്ല.

നേതാക്കളുടെ മക്കളുടെ അഴിമതി സിപിഎമ്മിനെ ജീർണിപ്പിക്കുന്നുവോ?

മുഖ്യമന്ത്രി പിണറായിയുടെ മകൾ വീണാ വിജയൻ, അന്തരിച്ച പ്രമുഖ നേതാവ് കൊടിയേരിയുടെ മക്കളായ ബിനോയ്, ബിനീഷ് കൊടിയേരിമാർ, ഇ പി ജയരാജന്റെ മകൻ ജയ്സൺ എന്നിങ്ങനെ പ്രമുഖൻ നേതാക്കളുടെ മക്കൾക്കെതിരെ ഉയരുന്നത് കോടിക്കണക്കിന് രൂപയുടെ അഴിമതി ആരോപണങ്ങളാണ്. സംസ്ഥാന ഭരണത്തിന്റെ തണലിൽ നേതാക്കളുടെ മക്കൾ കോടീശ്വരന്മാരാകുമ്പോൾ കേരളമെന്ന സംസ്ഥാനം സാമ്പത്തിക പ്രതിസന്ധിയിൽ നട്ടംതിരിയുകയാണ്. അതുകൊണ്ടുതന്നെ പൊതുസമൂഹത്തിൽ പാർട്ടിക്ക് ഉണ്ടായിരിക്കുന്ന അവമതിപ്പ് ചില്ലറയല്ല. സംസ്ഥാന സമിതി അംഗമാണ് അഴിമതി ആരോപണം ഉയർത്തിയിരിക്കുന്നത് എന്നതുകൊണ്ട് തന്നെ ഇപിയെ മാത്രമല്ല ഇത് ബാധിക്കുക എല്ലാ നേതാക്കളുടെയും മക്കൾ നടത്തിയ അഴിമതിയെക്കുറിച്ച് അന്വേഷണം നടത്താൻ പാർട്ടി നിർബന്ധിതമാകും. അവസരം മുതലാക്കി കേന്ദ്ര ഏജൻസികളും രംഗത്ത് വന്നു കൂടായ്കയില്ല. അങ്ങനെയൊക്കെ സംഭവിച്ചാൽ ഒരുപക്ഷേ സിപിഎമ്മിനെ തലമുറ മാറ്റം ഉണ്ടാവുക മുതിർന്ന നേതാക്കളുടെ മക്കൾ നടത്തിയ അഴിമതിയുടെ പേരിൽ ആവാം.