കേരളത്തിലെ കോണ്ഗ്രസ് പുനഃസംഘടന നിര്ത്തിവയ്ക്കാന് ഹൈക്കമാന്റ് നിര്ദേശം. കേരളത്തിന്റെ ചുതലയുള്ള എ ഐ സി സി ജനറല് സെക്രട്ടറി താരിഖ് അന്വറാണ് കെ പി സി സി അധ്യക്ഷന് കെ സുധാകരന് നിര്ദേശം നല്കിയത്. എം പിമാരുടെ പരാതിയെ തുടര്ന്നാണ് പുനഃസംഘടന നിര്ത്തിവയ്ക്കാന് കേരളത്തിന്റെ ചുതലയുള്ള എ ഐ സി സി ജനറല് സെക്രട്ടറി താരിഖ് അന്വര് കെ പി സി സി അധ്യക്ഷന് കെ സുധാകരന് നിര്ദേശം നല്കിയത്. പുനഃസംഘടന ചര്ച്ചകളില് എം പിമാരെ ഉള്പ്പെടുത്തിയില്ലെന്നായിരുന്നു ഉയര്ന്ന പരാതി.
പാര്ട്ടി പുനഃസംഘടനക്കെതിരെ നേരത്തെ എ, ഐ ഗ്രൂപ്പുകള് രംഗത്തെത്തിയിരുന്നു. സംഘടനാ തെരഞ്ഞെടുപ്പ് പ്രഖ്യാപിച്ച സാഹചര്യത്തില് ഇനി പുനഃസംഘടന വേണ്ടെന്ന് കെപിസിസി യോഗത്തില് ഗ്രൂപ്പ് നേതാക്കള് ശക്തമായ നിലപാടെടുത്തിരുന്നു. ഇത് സുധാകരനും ഗ്രൂപ്പുനേതാക്കളും തമ്മിലുള്ള ശക്തമായ വാക്പോരിന് അന്ന് വഴി വച്ചിരുന്നു.
എന്നാല് കെ പി സി സി പുനഃസംഘടനയുമായി മുന്നോട്ട് പോകുമെന്നും അതിന് ഹൈക്കമാന്റ് അനുമതി ഉണ്ടെന്നുമുള്ള നിലപാടിലായിരുന്നു കെ പി സി സി അധ്യക്ഷന് കെ സുധാകരന്. ഇതനുസരിച്ചുള്ള നടപടികള് പുരോഗമിക്കവെ ആണ് ചര്ച്ചകളില് സഹകരിപ്പിച്ചില്ലെന്ന പരാതിയുമായി എം പിമാര് ഹൈക്കമാന്റിനെ സമീപിച്ചത്.
എന്നാല് ഇക്കാര്യത്തില് കെപിസിസി അദ്ധ്യക്ഷന് കെ. സുധാകരന് കടുത്ത അതൃപ്തിയുണ്ടെന്നാണ് സൂചന. പുനസംഘടനയില് ആര്ക്കാണ് അതൃപ്തിയുള്ളതെന്ന് വ്യക്തമാക്കണമെന്ന് കാണിച്ച് സുധാകരന് ഹൈക്കമാന്ഡിന് പരാതി നല്കിയിട്ടുണ്ടെന്നാണ് വിവരം. എല്ലാവിഭാഗം ആളുകളുമായും ചര്ച്ച നടത്തിക്കഴിഞ്ഞതാണ്. അതുകൊണ്ടുതന്നെ പരാതിക്ക് പിന്നില് മറ്റെന്തെങ്കിലും ഉദ്ദേശമുണ്ടോയെന്ന് പരിശോധിക്കണമെന്നും സുധാകരന് ഹൈക്കമാന്ഡിനോട് ആവശ്യപ്പെട്ടിട്ടുണ്ട്.