തിരുവനന്തപുരം :ഐ എം ജിയുടെ നേതൃത്വത്തില് സംസ്ഥാനത്തെ മന്ത്രിമാര്ക്കായി സംഘടിപ്പിക്കുന്ന പരിശീലന പരിപാടി ഇന്ന് തുടക്കമാകും.
മുഖ്യമന്ത്രി പിണറായി വിജയന് പരിശീലന പരിപാടി ഉദ്ഘാടനം ചെയ്യും. മൂന്നു ദിവസം നീണ്ടു നില്ക്കുന്ന പരിശീലന പരിപാടിയില് പത്ത് സെഷനുകളാണുള്ളത്. ഭരണസംവിധാനത്തെ കുറിച്ച് മന്ത്രിമാര്ക്ക് അവബോധം ഉണ്ടാക്കുകയാണ് പരിപാടിയുടെ പ്രധാന ലക്ഷ്യം.
ഇതിന്റെ ഭാഗമായി വരുന്ന മൂന്നു ദിവസങ്ങളിലായി സംസ്ഥാനത്തെ മന്ത്രിമാര് വിദ്യാര്ഥികളാകും. തിരുവനന്തപുരം ഐ എം ജിയിലാണ് പരിശീലന പരിപാടി സംഘടിപ്പിച്ചിരിക്കുന്നത്. അധികാരത്തില് എത്തി 100 ദിനം പൂര്ത്തിയാക്കിയിട്ടും പ്രതീക്ഷിച്ച നിലവാരത്തിലേക്ക് മന്ത്രിമാരുടെ പ്രവര്ത്തനം എത്താതും പരീശീലന പദ്ധതിക്ക് പിന്നില് ഉണ്ട്. വകുപ്പുകളുമായി ബന്ധപ്പെട്ട കാര്യങ്ങളില് മുതിര്ന്ന ഉദ്യോഗസ്ഥരും, മുന് ചീഫ് സെക്രട്ടറിമാരും ക്ലാസുകള് നയിക്കും.
ക്ലാസുകളില് മന്ത്രിമാര് പങ്കെടുക്കണമെന്ന നിര്ദേശം മുഖ്യമന്ത്രി തന്നെ കഴിഞ്ഞ മന്ത്രിസഭ യോഗത്തില് നല്കിയിരുന്നു. ഒരു മണിക്കൂര് വീതമുള്ള 10 ക്ലാസുകളാണ് ക്രമീകരിച്ചിരിക്കുന്നത്.
22ന് പരിശീലന പദ്ധതി അവസാനിക്കും. ദുരന്തവേളകളില് നേതൃത്വം അഭിമുഖീകരിക്കുന്ന വെല്ലുവിളികള്, മന്ത്രിയെന്ന നിലയില് എങ്ങനെ ടീം ലീഡര് ആകാം തുടങ്ങിയ സെഷനുകളാണ് ആദ്യ ദിനം.