ബെംഗളൂരു: ബെംഗളൂരു നഗരത്തിലെ ഫാം ഹൗസില്‍ നടന്ന റേവ് പാർട്ടിയില്‍ പങ്കെടുത്തവരുടെ പരിശോധനാഫലം പുറത്തുവന്നതോടെ തെലുങ്ക് നടി ഹേമ കുരുക്കില്‍. ഹേമ ഉള്‍പ്പെടെ 86 പേർ മയക്കുമരുന്ന് ഉപയോഗിച്ചതായി സ്ഥിരീകരിച്ചു. പാർട്ടിയില്‍ 73 പുരുഷന്മാരും 30 സ്ത്രീകളും പങ്കെടുത്തതായി എഫ്‌ഐആറില്‍ പറയുന്നു. റേവ് പാർട്ടിയില്‍ പങ്കെടുത്ത 104 പേർക്കെതിരെ കേസെടുത്തിരുന്നു.
പരിശോധനയില്‍ 59 പുരുഷന്മാരുടെയും 27 സ്ത്രീകളുടെയും രക്തസാമ്ബിളുകള്‍ പോസിറ്റീവായി. മൊത്തത്തില്‍, 103 വ്യക്തികളില്‍ 86 പേർ മയക്കുമരുന്ന് ഉപയോഗിച്ചതായും പൊലീസ് പറഞ്ഞു. രക്തസാമ്ബിളുകള്‍ പോസിറ്റീവായതായി കണ്ടെത്തിയവർക്ക് സെൻട്രല്‍ ക്രൈംബ്രാഞ്ച് (സിസിബി) നോട്ടീസ് നല്‍കും. മയക്കുമരുന്ന് പരിശോധനയില്‍ പോസിറ്റീവ് ആയവരെയും വിളിപ്പിക്കും. കേസ് സെൻട്രല്‍ ക്രൈംബ്രാഞ്ച് ഏറ്റെടുത്തു.
14.40 ഗ്രാം എംഡിഎംഎ ഗുളികകള്‍, 1.16 ഗ്രാം എംഡിഎംഎ ക്രിസ്റ്റലുകള്‍, ആറ് ഗ്രാം ഹൈഡ്രോ കഞ്ചാവ്, അഞ്ച് ഗ്രാം കൊക്കെയ്ൻ, കൊക്കെയ്ൻ പുരട്ടിയ 500 രൂപ നോട്ട്, ആറ് ഗ്രാം ഹൈഡ്രോ ഗഞ്ച, അഞ്ച് മൊബൈല്‍ ഫോണുകള്‍, രണ്ട് വാഹനങ്ങള്‍ എന്നിവ പൊലീസ് പിടിച്ചെടുത്തു.ഒരു ലാൻഡ് റോവർ, 1.5 കോടി രൂപ വിലമതിക്കുന്ന ശബ്ദ-വെളിച്ച സംവിധാനങ്ങള്‍ ഉള്‍പ്പെടെയുള്ള ഡിജെ ഉപകരണങ്ങളും പിടികൂടി.
പാർട്ടിയുടെ സ്വഭാവം തനിക്ക് അറിയുമായിരുന്നില്ലെന്ന് തെലുങ്ക് നടൻ ആഷി റോയ് പറഞ്ഞു. പാർട്ടിയില്‍ ഉണ്ടായിരുന്നെങ്കിലും ഉള്ളില്‍ എന്താണ് നടക്കുന്നതെന്ന് അറിയില്ലെന്ന് നടൻ പറഞ്ഞു. കോണ്‍ കാർഡിന്റെ ഉടമ ഗോപാല റെഡ്ഡിയുടെ ഉടമസ്ഥതയിലുള്ളതാണ് ഫാംഹൗസ്. ഹൈദരാബാദ് ആസ്ഥാനമായുള്ള വാസു എന്നയാളാണ് പാർട്ടി സംഘടിപ്പിച്ചത്.
