കോലഞ്ചേരി സെന്റ് പീറ്റേഴ്സ് കോളേജിൽ വ്യാഴാഴ്ച നടന്ന പരിപാടിക്കിടെയാണ് ജാസി ഗിഫ്റ്റിൻ്റെ പാട്ടിന് ഇടയിൽ പ്രിന്സിപ്പാള് ഇടപെട്ടത്. ജാസി ഗിഫ്റ്റും സംഘവും പാടുന്നതിനിടയില് പ്രിന്സിപ്പാള് വേദിയിലേക്ക് കയറി മൈക്ക് പിടിച്ചുവാങ്ങുകയായിരുന്നു. ജാസി ഗിഫ്റ്റിന് മാത്രമേ പാടുകയുള്ളൂ എന്ന് അറിയിച്ചതിനാലാണ് പാടാന് അനുവദിച്ചതെന്നും ഒപ്പം പാടാൻ എത്തിയ ആളെ ഒഴിവാക്കണമെന്നും പ്രിൻസിപ്പാള് ആവശ്യപ്പെട്ടു.
മൈക്ക് പിടിച്ച് വാങ്ങിയതോടെ പ്രിൻസിപ്പാളിന്റെ നടപടിയിൽ പ്രതിഷേധിച്ച് ജാസി ഗിഫ്റ്റ് വേദി വിട്ട് ഇറങ്ങിപ്പോയി.അതേസമയം തന്റെ ഭാഗത്ത് നിന്ന് വീഴ്ചയുണ്ടായിട്ടില്ലെന്ന് കോലഞ്ചേരി സെന്റ് പീറ്റേഴ്സ് കോളേജ് പ്രിൻസിപ്പാള് പ്രതികരിച്ചു. പുറത്ത് നിന്നുള്ള ആളുകളുടെ സംഗീത നിശ കോളേജിനകത്ത് നടത്തുന്നതിന് നിയന്ത്രണങ്ങളുണ്ട്. ഇക്കാര്യം മൈക്ക് വാങ്ങി പറയുക മാത്രമാണ് ചെയ്തത്. ഉദ്ഘാടകൻ ആയ ജാസി ഗിഫ്റ്റിന് മാത്രം പാടാനാണ് അനുമതി നൽകിയിരുന്നതെന്നും അവര് വ്യക്തമാക്കി.