സൈക്കിളിൽ യാത്ര ചെയ്തിരുന്ന പെൺകുട്ടിയുടെ ദുപ്പെട്ട അഴിച്ചെടുക്കാൻ പൂവാലന്മാരുടെ ശ്രമം; നിയന്ത്രണം വിട്ടു റോഡിൽ വീണ പെൺകുട്ടിക്ക് മറ്റൊരു ബൈക്കിടിച്ച് ദാരുണാന്ത്യം: വിശദാംശങ്ങളും വീഡിയോ ദൃശ്യങ്ങളും വാർത്തയോടൊപ്പം.

ബൈക്കിലെത്തിയവര്‍ ദുപ്പട്ട വലിച്ചഴിക്കാൻ ശ്രമിച്ചതിനെ തുടര്‍ന്ന് റോഡില്‍ വീണ സൈക്കിള്‍ യാത്രക്കാരി മറ്റൊരു ബൈക്കിടിച്ച്‌ മരിച്ചു. ഉത്തര്‍പ്രദേശിലെ അംബേദ്കര്‍നഗറിലുണ്ടായ ദാരുണമായ അപകടത്തിലാണ് സ്കൂള്‍ വിദ്യാര്‍ഥിനിയായ 17-കാരി കൊല്ലപ്പെട്ടത്. സംഭവവുമായി ബന്ധപ്പെട്ട് മൂന്നുപേരെ പോലീസ് അറസ്റ്റ് ചെയ്തു.

ഹൻസ്വാര്‍ പോലീസ് സ്റ്റേഷൻ പരിധിയിലെ ഹിരാപുര്‍ മാര്‍ക്കറ്റിന് സമീപമായിരുന്നു അപകടം. സൈക്കിളില്‍ വരികയായിരുന്ന 17-കാരിയുടെ ദുപ്പട്ട ബൈക്കിലെത്തിയ യുവാക്കള്‍ വലിച്ചഴിക്കാൻ ശ്രമിക്കുകയായിരുന്നു. ഇതോടെ സൈക്കിളിന്റെ നിയന്ത്രണംതെറ്റി പെണ്‍കുട്ടി റോഡില്‍ വീഴുകയും പിന്നാലെ എത്തിയ മറ്റൊരു ബൈക്ക് പെണ്‍കുട്ടിയെ ഇടിക്കുകയുമായിരുന്നു. അപകടത്തില്‍ തലയ്ക്ക് അടക്കം ഗുരുതരമായി പരിക്കേറ്റ പെണ്‍കുട്ടി തല്‍ക്ഷണം മരിച്ചെന്നാണ് റിപ്പോര്‍ട്ട്. അപകടത്തിന്റെ സിസിടിവി ദൃശ്യങ്ങളും പുറത്തുവന്നിട്ടുണ്ട്.