പുനലൂര്‍: ധനലക്ഷ്മി ബാങ്ക് പുനലൂര്‍ ബ്രാഞ്ചിന്റെ ചൗക്ക റോഡില്‍ സ്ഥിതി ചെയ്യുന്ന എ.ടി.എം പൊളിച്ച് പണം കവരാന്‍ ശ്രമിച്ച പ്രതിയെ പുനലൂര്‍ പൊലീസ് അറസ്റ്റ് ചെയ്തു. ആലപ്പുഴ തകഴി പടഹാരം ശ്യാം ഭവനില്‍ അപ്പുവിനെ(20)യാണ് തിരുവനന്തപുരത്ത് നിന്ന് പുനലൂരിലെ ഡെപ്യൂട്ടി പൊലീസ് സൂപ്രണ്ട് ബി.വിനോദ്കുമാറിന്റെ നേതൃത്വത്തിലുള്ള പൊലീസ് അറസ്റ്റ് ചെയ്തത്.
5ന് പുലര്‍ച്ചെ 3.30ഓടെയായിരുന്നു എ.ടി.എമ്മില്‍ കവര്‍ച്ചാ ശ്രമം നടന്നത്. തുടര്‍ന്ന് ഡോഗ്സ്ക്വാഡും, ഫിംഗര്‍പ്രിന്റ് വിദഗ്ദ്ധരും പരിശോധ നടത്തി. സമീപ പ്രദേശങ്ങളിലെ സി.സി.ടി.വി കാമറ ദൃശ്യങ്ങളും ശേഖരിച്ചിരുന്നു . ഇതിന് ഒരാഴ്ച മുമ്ബ് എറ്റുമാന്നൂരിലും കൊല്ലം ഈസ്റ്റ് പൊലീസ് സ്റ്റേഷന്‍ പരിധിയിലും സമാനമായ എ.ടി.എം കവര്‍ച്ച ശ്രമം നടത്തിയിരുന്നു. ഇതിന്റെ കാമറ ദൃശ്യങ്ങള്‍ പരിശോധിച്ചപ്പോള്‍ കവര്‍ച്ചശ്രമങ്ങള്‍ എല്ലാം നടത്തിയത് ഒരാളാണെന്ന് മനസിലാക്കാന്‍ കഴിഞ്ഞെന്ന് ഡി വൈ.എസ്.പി പറഞ്ഞു. തുടര്‍ന്നാണ് അപ്പുവിനെ കേന്ദ്രീകരിച്ച്‌ ഡിവൈ.എസ്.പിയുടെ സ്പെഷ്യല്‍ സ്ക്വാഡ് അന്വേഷണം ആരംഭിച്ചത്.
സംഭവ ദിവസം പുലര്‍ച്ചെ 3.10ന് പാലരുവി- തിരുനെല്‍വേലി എക്സ് പ്രസ് ട്രെയിനില്‍ പ്രതി പുനലൂര്‍ റെയില്‍വേ സ്റ്റേഷനിലെത്തി. തുടര്‍ന്ന് ചൗക്ക റോഡ് വഴി നടന്ന് ബാങ്കിന്റെ എ.ടി.എമ്മില്‍ കയറി ബാഗില്‍ സൂക്ഷിച്ചിരുന്നു ആയുധങ്ങള്‍ ഉപയോഗിച്ച് കൗണ്ടര്‍ പൊളിച്ച്‌പണം കവരാന്‍ ശ്രമിച്ചെങ്കിലും നടന്നില്ല. തുടര്‍ന്ന് കുന്നിക്കോട് ഭാഗത്തേക്ക് നടന്ന് പോകുന്നതിനിടെ യുവാവ് ഒരു ബൈക്ക് മോഷ്ടിക്കാനും ശ്രമിച്ചു. പിന്നീട് കൊട്ടാരക്കര ഡിപ്പോയിലേക്ക് വന്ന കെ.എസ്.ആര്‍.ടി.സി ബസില്‍ കയറി എറണാകുളത്തെ വാടക വീട്ടിലേക്ക് മടങ്ങുകയായിരുന്നുവെന്നും ഡി.വൈ.എസ്.പി അറിയിച്ചു.
പിന്നീട് തിരുവനന്തപുരത്ത് ഒളിവില്‍ കഴിഞ്ഞിരുന്ന പ്രതിയെ അറസ്റ്റ് ചെയ്യുകയായിരുന്നു. പ്രതിയെ ഇന്ന് കോടതിയില്‍ ഹാജരാക്കും. സി.ഐ. ബിനു വര്‍ഗീസ്, എസ്.ഐമാരായ ഹരീഷ്,രാജശേഖരന്‍,ഷിബു,കൃഷ്ണകുമാര്‍, സി.പി.ഒമാരായ രാജ്ബീര്‍, അജാസ്,രജിത് ലാല്‍,രഞിജ്ത്ത് തുടങ്ങിയ സ്പെഷ്യല്‍ സ്ക്വാഡ് അംഗങ്ങളും ഡിവൈ.എസ്.പിക്കൊപ്പം ഉണ്ടായിരുന്നു.
