വയനാട്: മയക്കുമരുന്നുമായി മലയാള സിനിമാ-സീരിയല് അഭിനേതാവ് അറസ്റ്റില്. പഴയ വൈത്തിരിയിലെ ഹോം സ്റ്റേയില് നടത്തിയ പരിശോധനയിലാണ് അതിമാരക മയക്കുമരുന്ന് കണ്ടെടുത്തത്. എറണാകുളം കടമക്കുടി മൂലമ്ബള്ളി പനക്കല് വീട്ടില് പി.ജെ. ഡെന്സണ് (44) നെ വൈത്തിരി പൊലീസ് അറസ്റ്റ് ചെയ്തു. അതിമാരക മയക്കുമരുന്ന് വിഭാഗത്തില് പെട്ട എല്.എസ്.ഡി സ്റ്റാമ്ബുകളുമായാണ് ഇയാള് പിടിയിലായത്.
ഡെന്സന്റെ പക്കല് നിന്ന് 0.140ഗ്രാം എല്.എസ്.ഡി സ്റ്റാമ്ബുകള് കണ്ടെടുത്തു. രഹസ്യ വിവരത്തെ തുടര്ന്നു വൈത്തിരി എസ്.ഐ ഇ. രാംകുമാറും സംഘവും വയനാട് പൊലീസ് മേധാവിയുടെ ലഹരി വിരുദ്ധ സേനാംഗങ്ങളും നാര്ക്കോട്ടിക് സെല് ഡി.വൈ.എസ്.പി രജികുമാറിന്റ നേതൃത്വത്തിലാണ് പരിശോധന നടത്തിയത്.
ഓര്മ ശക്തിയെ സാരമായി ബാധിക്കുന്ന അതിമാരക മയക്കുമരുന്നാണ് എല്.എസ്.ഡി സ്റ്റാമ്ബുകള്. 40000 രൂപയോളം വില വരുന്നതാണിത്. ഇയാള്ക്കെതിരെ എന്.ഡി.പി.എസ് വകുപ്പ് പ്രകാരം കേസ് രജിസ്റ്റര് ചെയ്തിട്ടുണ്ട്.