കോട്ടയത്തെ കോൺഗ്രസ് എ ഗ്രൂപ്പിനുള്ളിൽ വീണ്ടും പൊട്ടിത്തെറി: ഉമ്മൻ ചാണ്ടിയെയും, ചാണ്ടി ഉമ്മനെയും പരിഹസിച്ച് ഫേസ്ബുക്ക് പോസ്റ്റുമായി യൂത്ത് കോൺഗ്രസ് മുൻ ജില്ലാ പ്രസിഡൻറും, ഡിസിസി ജനറൽ സെക്രട്ടറിയുമായ ജോബോയ് ജോർജ്.

ഉമ്മൻചാണ്ടി മുഖ്യമന്ത്രിയായിരുന്ന കാലത്ത് അദ്ദേഹത്തിൻറെ കോട്ടയം ജില്ലയിലെ ഏറ്റവും വിശ്വസ്തരായവരുടെ ഗണത്തിൽ ഉൾപ്പെട്ടിരുന്ന ആളാണ് ജോബോയ് ജോർജ്. നിലവിൽ കോട്ടയം ഡിസിസി യുടെ ജനറൽ സെക്രട്ടറി കൂടിയാണ് ജോബോയ്. ഗ്രൂപ്പിനുള്ളിൽ നിന്ന് മാറുന്ന സമവാക്യങ്ങളുടെ പ്രതിഫലനം ആണോ ഇത് എന്ന് ചർച്ചയാണ് ഇപ്പോൾ കോൺഗ്രസ് വൃത്തങ്ങളിൽ സജീവമായിരിക്കുന്നത്. പോസ്റ്റിൽ ചാണ്ടി ഉമ്മനെ മാത്രമല്ല ഉമ്മൻചാണ്ടിയേയും പരിഹസിച്ച് ഇരിക്കുന്നതാണ് കോട്ടയത്തെ കോൺഗ്രസിനുള്ളിലെ സമവാക്യങ്ങൾ മാറുന്നതിന് സൂചനയാണോ എന്ന സംശയം ശക്തമാകുവാൻ കാരണം.

പാർട്ടി പുന സംഘടനയുമായി ബന്ധപ്പെട്ട് കെപിസിസി പ്രസിഡൻറ് കെ സുധാകരൻ, പ്രതിപക്ഷനേതാവ് വി ഡി സതീശൻ, എഐസിസി ജനറൽ സെക്രട്ടറി കെ സി വേണുഗോപാൽ എന്നിവരുടെ നേതൃത്വത്തിൽ പുതിയ സമവാക്യങ്ങൾ രൂപപ്പെടുന്നു എന്ന വാർത്തകളോടെ അധികാരമുള്ള പക്ഷത്തേക്ക് ഐക്യദാർഢ്യം പ്രഖ്യാപിക്കുന്ന ഭാഗ്യാന്വേഷികളുടെ എണ്ണം കൂടുന്നുണ്ട് എന്നാണ് പേര് വെളിപ്പെടുത്താൻ ആഗ്രഹിക്കാത്ത ഒരു പ്രമുഖ കോൺഗ്രസ് നേതാവ് പ്രതികരിച്ചത്. ഏതായാലും കോട്ടയത്ത് കോൺഗ്രസ് എ ഗ്രൂപ്പിനുള്ളിൽ വരും ദിവസങ്ങളിൽ കൂടുതൽ പൊട്ടിത്തെറി ഉണ്ടാകുമെന്ന രീതിയിൽ തന്നെയാണ് ഇപ്പോൾ കാര്യങ്ങൾ മുന്നോട്ടുപോകുന്നത്.