പോസിറ്റിവിറ്റി എന്നത് ഒരു മനുഷ്യനെ സംബന്ധിച്ചിടത്തോളം വളരെ വലിയ കാര്യമാണ്. എന്ത് കാര്യത്തിലും പോസിറ്റീവ് ആയി ചിന്തിക്കാൻ സാധിച്ചാല്‍ ആ മനുഷ്യൻ ജീവിതത്തില്‍ തന്നെ വിജയിച്ച ആളാണെന്ന് പറയാൻ സാധിക്കും. പോസിറ്റിവിറ്റി നമ്മുടെ ജീവിതത്തില്‍ വർദ്ധിപ്പിക്കുന്നതിന് എന്തൊക്കെ കാര്യങ്ങള്‍ ശ്രദ്ധിക്കണം എന്ന് നോക്കാം.
രാവിലെ ഉറക്കം ഉണരുമ്ബോള്‍ എല്ലാ ദിവസവും നമ്മുടെ ജീവിതത്തിലെ സന്തോഷത്തിനും കഴിവുകള്‍ക്കും പിന്തുണ നല്‍കുന്ന ആളുകള്‍ക്ക് സ്വയം നന്ദി പ്രകടിപ്പിക്കുന്നത് പോസിറ്റിവിറ്റി വർദ്ധിപ്പിക്കുന്നതിന് വളരെയധികം ഗുണം ചെയ്യും. ശ്രദ്ധ കേന്ദ്രീകരിക്കുന്നതിനും മനസ്സിനെ ശാന്തമാക്കുന്നതിനും പിരിമുറുക്കം കുറച്ച്‌ പോസിറ്റിവിറ്റി വർദ്ധിപ്പിക്കുന്നതിനും മെഡിറ്റേഷൻ ചെയ്യുന്നത് നല്ലതാണ്.
ഒരു ദിവസം തുടങ്ങുമ്ബോള്‍ തന്നെ അന്ന് നിങ്ങള്‍ നേടാൻ ഉദ്ദേശിക്കുന്ന ലക്ഷ്യങ്ങള്‍ എന്തൊക്കെയാണെന്ന് എഴുതിവയ്‌ക്കുന്നതും ആ ദിവസത്തെ ഉത്പാദനക്ഷമമാക്കുന്നതിനും പോസിറ്റിവിറ്റി വർദ്ധിപ്പിക്കുന്നതിനും സഹായിക്കും. അതുപോലെതന്നെ മെറ്റബോളിസം വർദ്ധിപ്പിക്കുന്നതിന് രാവിലെ തന്നെ ഒരു ഗ്ലാസ് വെള്ളം കുടിക്കുന്നത് ദിവസം മുഴുവൻ ഊർജ്ജസ്വലരായിരിക്കാനും ശരീരത്തിലെ ജലാംശം നിലനിർത്തുന്നതിനും സഹായകരമാണ്.
പ്രധാനമായും ശ്രദ്ധിക്കേണ്ട മറ്റൊരു കാര്യമാണ് പ്രഭാത ഭക്ഷണം. പ്രഭാത ഭക്ഷണം പോഷക സമൃദ്ധമായി കഴിക്കുന്നത് മനസ്സിനെയും ശരീരത്തെയും പോഷിപ്പിച്ച്‌ പോസിറ്റിവിറ്റി പ്രദാനം ചെയ്യുന്നതിന് സഹായിക്കും. രാവിലെ 10 മിനിറ്റ് നേരമെങ്കിലും യോഗ, നടത്തം, ജോഗിംഗ്, സ്ട്രെച്ചിങ് തുടങ്ങി എന്തെങ്കിലും തരത്തിലുള്ള വ്യായാമം ചെയ്യുന്നതും ജീവിതത്തില്‍ പോസിറ്റിവിറ്റി വർദ്ധിപ്പിക്കുന്നതിന് ഗുണകരമായ മാർഗമാണ്.
