ഇടത് തീവ്രവാദം രണ്ടുവർഷത്തിനകം രാജ്യത്ത് നിന്ന് പൂർണമായും ഇല്ലാതാക്കാൻ കേന്ദ്രവും സംസ്ഥാനങ്ങളും യോജിച്ച് നീങ്ങുമെന്ന് പ്രമേയം. കേന്ദ്ര ആഭ്യന്തര മന്ത്രി അമിത് ഷായുടെ നേതൃത്വത്തിൽ വെള്ളിയാഴ്ച മുഖ്യമന്ത്രിമാരുമായും ഉപമുഖ്യമന്ത്രിമാരുമായും ചേർന്ന ഉന്നതതല യോഗത്തിലാണ് അടുത്ത രണ്ട് വർഷത്തിനുള്ളിൽ രാജ്യത്ത് ഇടതുപക്ഷ തീവ്രവാദം തുടച്ചുനീക്കാനുള്ള പ്രമേയം പാസാക്കിയത്. ആഭ്യന്തര മന്ത്രാലയത്തിന്റെ കണക്കനുസരിച്ച്, 2022 ലും 2023 ലും തീവ്ര ഇടത് സംഘടനകൾക്കെതിരെ വലിയ നടപടികൾ എടുക്കാൻ സാധിച്ചിട്ടുണ്ടെന്ന് വിലയിരുത്തുന്നു.
“പ്രധാനമന്ത്രി മോദിയുടെ നിശ്ചയദാർഢ്യത്തോടെയും ഇടതുപക്ഷ തീവ്രവാദം ബാധിച്ച എല്ലാ സംസ്ഥാനങ്ങളുടെയും സഹകരണത്തോടെ 2022ലും 2023ലും അതിനെതിരെ വലിയ വിജയങ്ങൾ കൈവരിച്ചതായി അമിത് ഷാ പറഞ്ഞു. ഇടതുതീവ്രവാദത്തെ പൂർണ്ണമായും ഇല്ലാതാക്കാനുള്ള പ്രമേയം കൈക്കൊള്ളുന്ന വർഷമാണിതെന്നും അദ്ദേഹം പറഞ്ഞു” ആഭ്യന്തര മന്ത്രാലയം പത്രക്കുറിപ്പിൽ പറഞ്ഞു.
സർക്കാരിന്റെ നയത്തിന്റെ ഫലമായി, തീവ്ര ഇടത് സംഘനടകളുമായി ബന്ധപ്പെട്ട അക്രമങ്ങളുടെയും മരണങ്ങളുടെയും ഏറ്റവും താഴ്ന്ന നില രേഖപ്പെടുത്തിയത് 2022ൽ ആണെന്നും അമിത് ഷാ പറഞ്ഞു. 2005 മുതൽ 2014 വരെയുള്ള കാലയളവിനെ അപേക്ഷിച്ച് അക്രമം, മരണങ്ങൾ, സുരക്ഷാ ഉദ്യോഗസ്ഥരുടെ മരണം, സിവിലിയൻ മരണങ്ങൾ എന്നിവ 2014 നും 2023 നും ഇടയിൽ വലിയതോതിൽ കുറഞ്ഞിട്ടുണ്ട്
ദേശീയ അന്വേഷണ ഏജൻസിയും (എൻഐഎ) എൻഫോഴ്‌സ്‌മെന്റ് ഡയറക്ടറേറ്റും (ഇഡി) എല്ലാ സംസ്ഥാന ഏജൻസികളുമായും ചേർന്ന് ഇടതു തീവ്രവാദത്തിന് സാമ്പത്തിക സഹായം നൽകുന്നതിനെതിരെ പ്രവർത്തിക്കുന്നുണ്ടെന്ന് ആഭ്യന്തരമന്ത്രി പറഞ്ഞു.
കേന്ദ്ര സായുധ പോലീസ് സേനയുടെ (സിഎപിഎഫ്) 195 പുതിയ ക്യാമ്പുകൾ സ്ഥാപിച്ചിട്ടുണ്ടെന്നും 44 എണ്ണം കൂടി സ്ഥാപിക്കുമെന്നും അദ്ദേഹം പറഞ്ഞു. ഇടതുപക്ഷ തീവ്രവാദത്തിനെതിരായ സിഎപിഎഫുകളുടെ വിന്യാസം, പ്രശ്നബാധിത പ്രദേശങ്ങളിൽ ക്യാമ്പുകൾ സ്ഥാപിക്കൽ എന്നിവയ്ക്ക് നരേന്ദ്ര മോദി സർക്കാർ പ്രഥമ പരിഗണനയാണ് നൽകുന്നതെന്ന് അമിത് ഷാ പറഞ്ഞു.
ഇടതുപക്ഷ തീവ്രവാദ ബാധിത സംസ്ഥാനങ്ങളിൽ വികസനം വേഗത്തിലാക്കാൻ മോദി സർക്കാർ നിരവധി നടപടികൾ സ്വീകരിക്കുന്നുണ്ടെന്ന് ആഭ്യന്തരമന്ത്രി പറഞ്ഞു. റോഡ് നിർമ്മാണം, ടെലികമ്മ്യൂണിക്കേഷൻ, സാമ്പത്തിക സഹായം, നൈപുണ്യ വികസനം, വിദ്യാഭ്യാസം തുടങ്ങിയ മേഖലകളിൽ പ്രത്യേക ശ്രദ്ധ ചെലുത്തുന്നുണ്ടെന്ന് അദ്ദേഹം പറഞ്ഞു. ഇടതുപക്ഷ തീവ്രവാദം ഏറ്റവും കൂടുതൽ ബാധിച്ച ജില്ലകളിൽ വികസനം ത്വരിതപ്പെടുത്തുന്നതിന് പ്രത്യേക കേന്ദ്ര സഹായം (എസ്‌സി‌എ) പദ്ധതിക്ക് കീഴിൽ കേന്ദ്ര സർക്കാർ 14,000-ത്തിലധികം പദ്ധതികൾ ആരംഭിച്ചതായി ഷാ പറഞ്ഞു.
ഈ പദ്ധതികളുടെ 80 ശതമാനത്തിലധികം പൂർത്തീകരിച്ചിട്ടുണ്ടെന്നും പദ്ധതി പ്രകാരം ഇടതുപക്ഷ തീവ്രവാദ ബാധിത സംസ്ഥാനങ്ങൾക്ക് 3,296 കോടി രൂപ അനുവദിച്ചിട്ടുണ്ടെന്നും യോഗത്തിൽ ഷാ ഊന്നിപ്പറഞ്ഞു.
സ്പെഷ്യൽ ഇൻഫ്രാസ്ട്രക്ചർ സ്കീം (എസ്ഐഎസ്) പ്രകാരം 992 കോടി രൂപയുടെ പ്രോജക്ടുകൾ ശക്തിപ്പെടുത്തിയ പോലീസ് സ്റ്റേഷനുകൾ, സംസ്ഥാന രഹസ്യാന്വേഷണ വിഭാഗങ്ങൾ ശക്തിപ്പെടുത്തൽ, ഇടതുപക്ഷ തീവ്രവാദ ബാധിത സംസ്ഥാനങ്ങളുടെ പ്രത്യേക സേനകൾ എന്നിവയ്ക്കായി അനുവദിച്ചതായി അമിത് ഷാ പറഞ്ഞു. കഴിഞ്ഞ 9 വർഷത്തിനിടയിൽ, സുരക്ഷാ അനുബന്ധ ചെലവ് (എസ്ആർഇ) മുൻ കാലത്തെ അപേക്ഷിച്ച് മോദി സർക്കാർ ഇരട്ടിയിലധികം വർദ്ധിപ്പിച്ചു.
കേന്ദ്രമന്ത്രിമാർ, ദേശീയ സുരക്ഷാ ഉപദേഷ്ടാവ്, കേന്ദ്ര ആഭ്യന്തര സെക്രട്ടറി, സിഎപിഎഫ് ഡയറക്ടർ ജനറൽമാർ, കേന്ദ്ര സർക്കാർ സെക്രട്ടറിമാർ, സംസ്ഥാനങ്ങളിലെ ചീഫ് സെക്രട്ടറിമാർ, പൊലീസ് ഡയറക്ടർ ജനറൽമാർ, മറ്റ് മുതിർന്ന ഉദ്യോഗസ്ഥർ എന്നിവരും യോഗത്തിൽ പങ്കെടുത്തു.
