കുവൈത്തില് നിന്ന് റിയാദിലേക്ക് ടൂറിസ്റ്റ് വിസയിലെത്തിയ ഇന്ത്യന് കുടുംബം അപകടത്തില് മരിച്ചു. വെള്ളിയാഴ്ച പുലര്ച്ചെ ആറിന് റിയാദിനടുത്ത് തുമാമയില് ഹഫ്ന തുവൈഖ് റോഡില് ഇവര് സഞ്ചരിച്ചിരുന്ന ഫോര്ഡ് കാറും സൗദി പൗരന് ഓടിച്ചന്ന ട്രെയിലറും കൂട്ടിയിടിച്ച് തീപിടിച്ചായിരുന്നു അപകടം.
ഫോര്ഡ് കാര് പൂര്ണമായും കത്തിയിട്ടുണ്ട്. മൃതദേഹങ്ങളും രേഖകളും ചാരമായി. അഞ്ചു പേരാണ് മരിച്ചത്. റിയാദ് ട്രാഫിക് പൊലീസ് റിയാദിലെ മലയാളി സാമൂഹിക പ്രവര്ത്തകന് സിദ്ദീഖ് തുവ്വൂരിനെ അറിയിച്ചതാണ് ഈ വിവരം.ംഹൈദരാബാദ് സ്വദേശികളായ ഗൗസ് ദാന്തു (35), ഭാര്യ തബ്റാക് സര്വര് (31), മക്കളായ മുഹമ്മദ് ദാമില് ഗൗസ് (രണ്ട്), മുഹമ്മദ് ഈഹാന് ഗൗസ് (നാല്) എന്നിവരാണ് മരിച്ചതായി തിരിച്ചറിഞ്ഞത്. അഞ്ചാമന് ആരാണെന്ന് അറിവായിട്ടില്ല.
ഗൗസ് ദാന്തുവിന് കുവൈത്ത് ഇഖാമയാണുള്ളത്. മറ്റു വിവരങ്ങള് ലഭ്യമല്ല. കുവൈത്തില് നിന്ന് സൗദിയിലേക്ക് ടൂറിസ്റ്റ് വിസയില് വന്നതാണിവര്. മൃതദേഹങ്ങള് റിയാദില്നിന്ന് 100 കിലോമീറ്ററകലെ റുമാ ജനറല് ആശുപത്രി മോര്ച്ചറിയില് സൂക്ഷിച്ചിരിക്കുകയാണ്.