തിരുവനന്തപുരം: സോളാര് പീഡനപരാതിയില് ഉമ്മന് ചാണ്ടിക്കെതിരെയുള്ള കേസില് പി സി ജോര്ജ് രഹസ്യമൊഴി നല്കി. തിരുവനന്തപുരം ഒന്നാം ക്ലാസ് മജിസ്ട്രേറ്റ് കോടതി 12 ലാണ് പി സി ജോര്ജ് മൊഴി നല്കിയത്. സിബിഐയുടെ അപേക്ഷ പ്രകാരമാണ് രഹസ്യമൊഴി നല്കിയത്. മുഖ്യമന്ത്രിയുടെ ഓഫീസില് വെച്ച് ഉമ്മന്ചാണ്ടി ശാരീരികമായി പീഡിപ്പിച്ചെന്നാണ് പരാതിക്കാരിയുടെ ആരോപണം.
അതേസമയം, സോളാര് പീഡനക്കേസിലെ സിബിഐ അന്വേഷണത്തില് അതൃപ്തിയുമായി പരാതിക്കാരി ഹൈക്കോടതിയെ സമീപിച്ചു. ലൈംഗിക പീഡനം നടത്തിയ ഉന്നതരിലേക്ക് അന്വേഷണം എത്തുന്നില്ലെന്ന് വ്യക്തമാക്കിയാണ് ഹര്ജി നല്കിയത് . മുഖ്യമന്ത്രിക്ക് നല്കിയ പരാതിയില് 18 പേരുടെ പേരുകളുണ്ടായിട്ടും 4 പേരെ മാത്രം പ്രതിയാക്കിയാണ് സിബിഐ അന്വേഷണമെന്നും പരാതിക്കാരി കോടതിയെ അറിയിച്ചു. ഈ സാഹചര്യത്തില് പ്രതിപ്പട്ടികയിലുള്ള എല്ലാവരെയും ചേര്ത്ത് അന്വേഷണം നടത്താന് കോടതി നിര്ദ്ദേശം നല്കണമെന്നാണ് ഹര്ജിക്കാരിയുടെ ആവശ്യം. ആറ് കേസുകള് രജിസ്റ്റര് ചെയ്ത സിബിഐ ഒരു കേസില് റിപ്പോര്ട്ട് സമര്പ്പിച്ചിട്ടുണ്ട്. സോളാര് കേസില് തന്നെ സാമ്ബത്തികമായും ലൈംഗികമായും ഉന്നത രാഷ്ട്രീയ നേതാക്കളും പൊലീസ് ഉദ്യോഗസ്ഥരും ചൂഷണം ചെയ്തെന്നാണ് പരാതി.
സോളാര് പീഡനക്കേസുമായി ബന്ധപ്പെട്ട് അടൂര് പ്രകാശ് എംപി, മുന് മന്ത്രി എ പി അനില്കുമാര് എന്നിവരെ സിബിഐ ചോദ്യം ചെയ്തു. അടൂര് പ്രകാശിനെ ദില്ലയിലും, അനില് കുമാറിനെ മലപ്പുറത്തും വച്ചാണ് ചോദ്യം ചെയ്തത്. സോളാര് തട്ടിപ്പ് കേസിലെ പ്രതി നല്കിയ പരാതിയില് ഇവര്ക്കെതിരെ ബലാത്സംഗത്തിന് കേസെടുത്തിരുന്നു . സോളാര് പദ്ധതിക്ക് സഹായം വാദ്ഗാനം ചെയ്ത് മന്ത്രിമന്ദിരങ്ങളിലും അതിഥി മന്ദിരങ്ങളിലും വച്ച് പീഡിപ്പിച്ചുവെന്നാണ് കേസ്.