ജയലളിതയുടെ മരണം: ശശികല ഉൾപ്പെടെ നാല് പേർക്കെതിരെ അന്വേഷണത്തിന് ഉത്തരവിട്ട് തമിഴ്നാട് സർക്കാർ.

എന്നാൽ മുഖ്യമന്ത്രി ജയലളിത 74 ദിവസം ആശുപത്രിയിൽ കഴിഞ്ഞിട്ടും ഇതു സംബന്ധിച്ച് സംസ്ഥാന സർക്കാരിന്റെ ഭാഗത്തുനിന്ന് വിശദീകരണമൊന്നും ഉണ്ടായിട്ടില്ല. സംശയാസ്പദമായ നടപടികളാണ് അപ്പോളോ ആശുപത്രിയുടെ ഭാഗത്ത് നിന്ന് തുടക്കം മുതൽ ഉണ്ടായത്. സ്ഥിരീകരിക്കാത്ത നിരവധി റിപ്പോർട്ടുകളാണ് ആശുപത്രിയിൽ നിന്ന് പുറത്തുവന്നത്. ജയലളിത സുഖം പ്രാപിക്കുന്നു എന്ന വാർത്തയുടെ പിറ്റേന്ന് തന്നെ അവർ മരുന്നുകളോട് പ്രതികരിക്കുന്നില്ലെന്ന് റിപ്പോർട്ടുകളുണ്ടായിരുന്നു. പിന്നീട് സ്പീക്കറിലൂടെ സംസാരിച്ചു തുടങ്ങിയതായി അറിയിച്ചു.

ഇത്തരം അനിശ്ചിതത്വങ്ങൾക്കൊടുവിൽ ജയ ചില രാഷ്ട്രീയ നേതാക്കളുമായി ചർച്ച നടത്തിയെന്നും സുപ്രധാന തീരുമാനങ്ങൾ എടുത്തെന്നും വാർത്തകൾ പരന്നു. ജയലളിത സുഖം പ്രാപിച്ചു വരികയാണെന്നും എപ്പോൾ വേണമെങ്കിലും ആശുപത്രിയിൽ നിന്ന് ഡിസ്ചാർജ് ചെയ്യാമെന്നും അപ്പോളോ ചെയർമാൻ ഡോ.പ്രതാപ് സി റെഡ്ഡി മാധ്യമങ്ങളോട് പറഞ്ഞു. പിന്നീട് പെട്ടെന്ന് ഹൃദ്രോഗം ഉണ്ടായെന്നും അതീവ ഗുരുതരാവസ്ഥയിലാണെന്നും അറിയിച്ചു. തുടർന്ന് ഡിസംബർ അഞ്ചിന് രാത്രി 11.30നാണ് മരണം സംഭവിച്ചതായി അറിയിപ്പ് വന്നത്.

മരണ സമയത്തെക്കുറിച്ചും ആശയക്കുഴപ്പം നിലനിൽക്കുന്നു. വളരെ നേരത്തെ മരിച്ചതാകാമെന്നാണ് സാഹചര്യങ്ങൾ സൂചിപ്പിക്കുന്നത്. പ്രമേഹരോഗിയായ ജയലളിതയ്ക്ക് തെറ്റായ മരുന്ന് നൽകി ഗുരുതരാവസ്ഥയിലായതിനെ തുടർന്നാണ് ആശുപത്രിയിൽ കൊണ്ടുപോയതെന്നാണ് അപ്പോളോയിൽ നിന്നുള്ള വെളിപ്പെടുത്തൽ. ആശുപത്രിയിൽ പ്രവേശിപ്പിക്കുന്നതിന് ഒരു ദിവസം മുമ്പ്, ജയ ചെന്നൈയിൽ ഒരു പൊതു പരിപാടിയിൽ പങ്കെടുക്കുകയും വളരെ സന്തോഷവതിയായി കാണപ്പെടുകയും ചെയ്തു. പിന്നെ എങ്ങനെയാണ് ഇത്ര പെട്ടെന്ന് അവര്‍ ഇത്ര ഗുരുതരാവസ്ഥയിലായത് എന്ന ചോദ്യം ഉയര്‍ന്നിരുന്നു.