ആലുവ: നമ്ബര്പ്ലേറ്റ് ഇല്ലാത്ത ബൈക്കില് പെണ്സുഹൃത്തുമായി കറങ്ങാനിറങ്ങിയ കൗമാരക്കാരനെ വീട്ടിലെത്തി പൊക്കി മോട്ടോര് വാഹന വകുപ്പ് ഉദ്യോഗസ്ഥര്. വാഹന പരിശോധനക്കിടെ നിര്ത്താതെ പോയ ബൈക്കിന്റെ ഉടമയെ തിരക്കിയിറങ്ങിയാണ് മോട്ടോര് വാഹന വകുപ്പ് ഉദ്യോഗസ്ഥര് ആലുവ കുട്ടമശേരി സ്വദേശിയായ കുട്ടി റൈഡറെ പിടികൂടിയത്.
ആലുവയില് മോട്ടോര് വാഹന വകുപ്പ് ഉദ്യോഗസ്ഥ വാഹന പരിശോധനയ്ക്കിടെയാണ് കുട്ടമശ്ശേരി സ്വദേശിയായ കൗമാരക്കാരന് നമ്ബര് പ്ലേറ്റ് ഇല്ലാത്ത ബൈക്കില് പെണ് സുഹൃത്തുമായി കറങ്ങുന്നത് ശ്രദ്ധയില്പ്പെട്ടത്. തുടര്ന്ന് വാഹനം പരിശോധിക്കാനായി നിര്ത്താന് ഉദ്യോഗസ്ഥര് ആവശ്യപ്പെട്ടു. പക്ഷേ ബൈക്ക് നിര്ത്താതെ വേഗത്തില് ഓടിച്ചു പോയി. എന്നാല് വാഹനത്തിന്റെ മറ്റൊരു ഭാഗത്ത് രേഖപ്പെടുത്തിയിരുന്ന രജിസ്ട്രേഷന് നമ്ബര് ഉദ്യോഗസ്ഥരുടെ ശ്രദ്ധയില് പെട്ടിരുന്നു. അങ്ങനെ എംവിഡി ഉദ്യോഗസ്ഥര് ഉടമയുമായി ബന്ധപ്പെട്ടു. എന്നാല്, വാഹനം വിറ്റതാണെന്ന് ഇയാള് അറിയിച്ചു. പുതിയ ഉടമയുടെ നമ്ബര് നല്കുകയും ചെയ്തു.
എന്നാല് നാല് ആളുകളുടെ കൈകളില് വാഹനം കൈമറിഞ്ഞെങ്കിലും ഉടമസ്ഥാവകാശം മാറ്റിയിരുന്നില്ല എന്ന് ഉദ്യോഗസ്ഥര് തിരിച്ചറിഞ്ഞു. തുടര്ന്ന് നടത്തിയ വിശദമായ പരിശോധനയില് 2021-ല് ഈ വാഹനത്തിനെതിരേ എടുത്ത ഒരു കേസ് കണ്ടെത്തി. അതില്നിന്ന് അന്നത്തെ ഉടമയെ ബന്ധപ്പെട്ടു. തുടര്ന്ന് ഈ വാഹനം വില്ക്കുന്നതിന് ഇടനിലക്കാരനായ വ്യക്തി മുഖാന്തരമാണ് പുതിയ ഉടമയെ കണ്ടെത്തിയത്.
ഇപ്പോള് വാഹനം സ്വന്തമാക്കിയിട്ടുള്ള ഉടമയുടെ അനുജന്റെ സുഹൃത്താണ് മോട്ടോര് വാഹന വകുപ്പ് പരിശോധന നടത്തിയപ്പോള് വാഹനം ഉപയോഗിച്ചിരുന്നത്. ഇതോടെ കുട്ടമശ്ശേരിയിലെ വീട്ടിലെത്തി കൗമാരക്കാരനെ കൈയോടെ പൊക്കുകയായിരുന്നു. സുഹൃത്തിന്റെ വാഹനത്തിന് സ്പെയര് പാര്ട്സ് വാങ്ങാനെന്ന പേരിലാണ് ബൈക്ക് ഓടിക്കാന് വാങ്ങിയത് എന്നാണ് ചോദ്യം ചെയ്യലില് ഇയാള് പറഞ്ഞത് എന്നാണ് റിപ്പോര്ട്ടുകള്.
കുട്ടി റൈഡര്ക്കെതിരെ കേസും എടുത്തു. ലൈസന്സ് ഇല്ലാതെ വാഹനം ഉപയോഗിച്ചതിനും ഉടമസ്ഥാവകാശം മാറ്റാത്തതിനും വാഹന പരിശോധനയ്ക്കിടെ നിര്ത്താതെ പോയതിനും ആണ് കേസ് എടുത്തത്. എറണാകുളം എന്ഫോഴ്സ്മെന്റ് ആര്.ടി.ഒയുടെ നിര്ദ്ദേശ പ്രകാരമായിരുന്നു പരിശോധന എന്നാണ് റിപ്പോര്ട്ടുകള്.