തിരുവനന്തപുരം: രോഗവ്യാപനനിരക്ക് കുറയാത്തതിനാല്‍ സംസ്ഥാനത്ത് കൂടുതല്‍ ലോക്ഡൗണ്‍ ഇളവുകളില്ല. നിലവിലുള്ള നിയന്ത്രണങ്ങള്‍ അതേപടി തുടരാനാണ് തീരുമാനം. മുഖ്യമന്ത്രി പിണറായി വിജയെന്‍റ അധ്യക്ഷതയില്‍ ചേര്‍ന്ന അവലോകന യോഗമാണ് തീരുമാനമെടുത്തത്.
ഞായറാഴ്ച പ്രാര്‍ഥനകള്‍ക്കായി ദേവാലയങ്ങള്‍ക്ക് കൂടുതല്‍ ഇളവ് അനുവദിക്കണമെന്ന് ക്രൈസ്തവ സഭകള്‍ ആവശ്യപ്പെട്ടിരുന്നെങ്കിലും വാരാന്ത്യ ലോക്ഡൗണ്‍ നിലനില്‍ക്കുന്നതിനാല്‍ കൂടുതല്‍ പേരെ ഉള്‍െപ്പടുത്താന്‍ അനുമതിയില്ല.
ആരാധനാലയങ്ങളില്‍ 15 പേര്‍ക്ക് പ്രവേശിക്കാമെന്ന നിലവിലെ അനുമതി മാത്രമാണുള്ളത്. അതും കോവിഡ് മാനദണ്ഡങ്ങള്‍ പാലിച്ചുകൊണ്ടാകണം. സംസ്ഥാനത്ത് ഞായറാഴ്ചയും സമ്ബൂര്‍ണ ലോക്ഡൗണ്‍ തുടരാണ് തീരുമാനം.
തിങ്കളാഴ്ചയൊഴികെ കഴിഞ്ഞ എട്ട് ദിവസവും രോഗവ്യാപനനിരക്ക് പത്തിന് മുകളിലായിരുന്നു. പ്രതിദിന രോഗികളുടെ എണ്ണം കുറയാത്തതും ചികിത്സയിലുള്ള രോഗികളുടെ എണ്ണം വീണ്ടും ഒരു ലക്ഷം കടന്നതും വെല്ലുവിളിയാണെന്ന് യോഗം വിലയിരുത്തി. ഇളവുകള്‍ അനുവദിച്ചപ്പോള്‍ പൊതുസ്ഥലങ്ങളില്‍ ആള്‍ത്തിരക്ക് വര്‍ധിച്ചു.
അതിനാല്‍ നിലവിലെ സാഹചര്യത്തില്‍ ഇപ്പോഴുള്ള ഇളവുകള്‍മതിയെന്ന് തീരുമാനിച്ചു. ചൊവ്വാഴ്ച വീണ്ടും അവലോകനയോഗം ചേര്‍ന്ന് കാര്യങ്ങള്‍ വിലയിരുത്തും.
