തിരുവനന്തപുരം: ഒന്നാം പിണറായി സര്‍ക്കാരിനെ അപേക്ഷിച്ച്‌ രണ്ടാം സര്‍ക്കാര്‍ പ്രവര്‍ത്തനങ്ങളില്‍ മുന്നോട്ടുവരുന്നില്ലെന്ന് സിപിഎം പത്തനംതിട്ട ജില്ലാ സമ്മേളനത്തില്‍ വിമര്‍ശനം. പല മന്ത്രിമാര്‍ക്കും മികവ് തെളിയിക്കാന്‍ കഴിയുന്നില്ല. അതേസമയം മന്ത്രി മുഹമ്മദ് റിയാസ് നടത്തുന്നത് മികച്ച പ്രവര്‍ത്തനങ്ങളാണെന്ന് സമ്മേളനത്തില്‍ അഭിപ്രായമുയര്‍ന്നു.
ആഭ്യന്തരവകുപ്പില്‍ പോരായ്മകളുണ്ട്. ഇക്കാര്യത്തില്‍ പാര്‍ട്ടി പ്രത്യേക ശ്രദ്ധപുലര്‍ത്തിയില്ലെങ്കില്‍ ക്ഷീണം സംഭവിക്കും. പൊലീസിലും സിവില്‍ സര്‍വീസിലും ആര്‍.എസ്.എസുകാരുടെ കടന്നുകയറ്റമുണ്ട്. പൊലീസിന്റെ പ്രവര്‍ത്തനം പലകാര്യങ്ങളിലും സര്‍ക്കാരിന് അവമതിപ്പ് ഉണ്ടാക്കുന്നു.
ജനങ്ങളുടെ ജീവനും സ്വത്തിനും സുരക്ഷിതത്വം നല്‌കലാണ് ഏതൊരു സര്‍ക്കാരിന്റെയും പ്രാഥമിക ചുമതല. വികസനവും ക്ഷേമപദ്ധതികളുമൊക്കെ അതുകഴിഞ്ഞേ വരൂ. ക്രമസമാധാന പരിപാലനത്തില്‍ പരാജയപ്പെട്ടാല്‍ സര്‍ക്കാരിന്റെ മറ്റെല്ലാ നേട്ടങ്ങളും നിഷ്പ്രഭമാകും. അതിനാല്‍ ആഭ്യന്തരവകുപ്പിനു വേണ്ടി മുഴുവന്‍ സമയവും ചെലവഴിക്കാന്‍ കഴിവുള്ള ഊര്‍ജ്ജസ്വലനായ ഒരു മന്ത്രി ആവശ്യമുണ്ടെന്ന് ചില നേതാക്കള്‍ അഭിപ്രായപ്പെട്ടു.മന്ത്രി സഭയില്‍ രണ്ടാമനായ എം.വി. ഗോവിന്ദന്‍ മാസ്റ്ററെയോ പി.എ. മുഹമ്മദ് റിയാസിനെയോ ഏല്‌പിക്കുന്നതാവും ഉചിതമെന്നാണ് ഇവര്‍ ചൂണ്ടിക്കാട്ടുന്നത്.
