തിരുവനന്തപുരം: കരാറുകാരുമായി എംഎല്എമാര് തന്നെ കാണാന് വരരുതെന്ന പ്രസ്താവനയില് ഉറച്ചുനില്ക്കുന്നതായി പൊതുമരാമത്ത് വകുപ്പ് മന്ത്രി പിഎ മുഹമ്മദ് റിയാസ്. കരാറുകാരും ചില ഉദ്യോഗസ്ഥരും തമ്മില് അവിശുദ്ധ കൂട്ടുകെട്ടുണ്ടെന്നത് വസ്തുതയാണെന്നും, എംഎല്എമാര് വരേണ്ടതില്ലെന്ന് പറഞ്ഞത് മറ്റ് മണ്ഡലങ്ങളിലെ കരാറുകാരേയും കൂട്ടി വരുന്നതിനെക്കുറിച്ചാണെന്നും മുഹമ്മദ് റിയാസ് വ്യക്തമാക്കി. സ്വന്തം മണ്ഡലത്തിലെ എംഎല്എമാരുമായി കരാറുകാര് വരുന്നതില് തെറ്റില്ല. എന്നാല് ചില എംഎല്എമാര് മറ്റു മണ്ഡലങ്ങളില് ഇടപെടുന്നുണ്ട്.
താന് പറയുന്നത് എല്ലാ കരാറുകാരും ഉദ്യോഗസ്ഥരും ഒരുപോലെയാണെന്നല്ല. ചിലര് തമ്മില് അവിശുദ്ധ കൂട്ടുക്കെട്ടുണ്ടെന്നാണ് പറഞ്ഞതെന്ന് മന്ത്രി പറഞ്ഞു.താന് പറഞ്ഞ കാര്യങ്ങള് സിഎജി റിപ്പോര്ട്ടിലും പരാമര്ശമുള്ള കാര്യങ്ങളാണ്. കരാറുകാരുമായി ഇടപെടുമ്ബോള് അവര് ആരാണെന്ന് അന്വേഷിക്കുന്നത് സ്വാഭാവികമാണ്. അത്തരം ഇടപെടലുകളില് ശ്രദ്ധ വേണമെന്നത് ഇടതുമുന്നണിയുടെ നിലപാടാണ്. അതില് ഭരണകക്ഷി എംഎല്എമാര് എതിര്പ്പ് പ്രകടിപ്പിക്കുമെന്ന് കരുതുന്നില്ലെന്നും മന്ത്രി കൂട്ടിച്ചേര്ത്തു.
മാര്ക്കറ്റ് വില കുറയുമ്ബോഴും കൂടിയ സമയത്തെ വിലയിട്ട് കരാര് ഉണ്ടാക്കുന്നു. ഒരു ജില്ലയുടെ ഇന്വോയിസ് മറ്റൊരു ജില്ലയുടേതെന്ന് കാണിക്കുന്നു. ഇത് കാരണം സര്ക്കാരിന് വലിയ സാമ്ബത്തിക ബാധ്യതയുണ്ടാകുന്നുവെന്നും മന്ത്രി ചൂണ്ടിക്കാട്ടി. സമയബന്ധിതമായി പണികള് തീര്ക്കാതിരിക്കുന്നതിലും ചില ഉദ്യോഗസ്ഥരുടെ ഇടപെടലുണ്ട്. താന് പറഞ്ഞിട്ടുള്ള കാര്യത്തില് ഉറച്ചു നില്ക്കുന്നുവെന്നും, ഒരടി പിറകോട്ടില്ലെന്നും മുഹമ്മദ് റിയാസ് വ്യക്തമാക്കി.