കോഴിക്കോട്: വൈദ്യുതിക്കാലുകളില്‍ വാഹനങ്ങള്‍ക്ക് ചാര്‍ജിങ് സ്റ്റേഷനുകളൊരുക്കി കെ.എസ്.ഇ.ബി. കോഴിക്കോട് ബീച്ച്‌, മേയര്‍ഭവന്‍, വെള്ളയില്‍ ഹാര്‍ബര്‍, അശോകപുരത്തിനടുത്ത് മുത്തപ്പന്‍കാവ്, ചെറൂട്ടി നഗര്‍, സരോവരം ബയോ പാര്‍ക്ക്, ശാസ്ത്രി നഗര്‍, എരഞ്ഞിപ്പാലം, മൂന്നാലിങ്ങല്‍, മാനാഞ്ചിറ സെയില്‍സ് ടാക്സ് ഓഫിസ് പരിസരം എന്നിവിടങ്ങളിലാണ് സ്റ്റേഷനുകള്‍ വരുന്നത്.
വൈദ്യുത സ്കൂട്ടറുകള്‍ക്കും ഓട്ടോകള്‍ക്കും ഇവിടെ ചാര്‍ജ് ചെയ്യാം. സരോവരം ബയോപാര്‍ക്കിനോട് ചേര്‍ന്ന് ബൈപാസിലെ ഓട്ടോ സ്റ്റാന്‍ഡില്‍ സ്റ്റേഷന്‍ പൂര്‍ണ സജ്ജമായി. ട്രയല്‍ റണ്‍ കഴിഞ്ഞ ദിവസം വിജയകരമായി നടന്നു. സംസ്ഥാനത്ത് കെ.എസ്.ഇ.ബി പദ്ധതിയുടെ ആദ്യ സ്റ്റേഷനാണിത്. സംസ്ഥാനത്ത് കൂടുതല്‍ ഇ-ഓട്ടോകള്‍ നടക്കാവ് സെക്ഷനില്‍ ആയതിനാലാണ് പദ്ധതി ആദ്യം ഇവിടെ നടപ്പാക്കിയത്. ഒക്ടോബര്‍ ഒമ്ബതിന് ബീച്ചില്‍ വൈദ്യുതി മന്ത്രി കെ. കൃഷ്ണന്‍കുട്ടി പദ്ധതി ഉദ്ഘാടനം ചെയ്യും.
ആപ് വഴി ക്യൂ.ആര്‍ കോഡ് സ്കാന്‍ ചെയ്ത് ചാര്‍ജിങ്ങിന് പണമടക്കാം. നടക്കാവ് കെ.എസ്.ഇ.ബി. സെക്ഷന് കീഴിലാണ് പ്രവൃത്തികള്‍. കാറുകള്‍ക്കുള്ള ചാര്‍ജിങ് സ്റ്റേഷനുകളും നഗരത്തിലെ വിവിധ ഭാഗങ്ങളില്‍ ഉടന്‍ ഒരുങ്ങും. യൂനിറ്റ് അടിസ്ഥാനത്തിലായിരിക്കും നിരക്ക് നിശ്ചയിക്കുക. 24 മണിക്കൂറും സേവനം ലഭ്യമാണ്.
