ആലപ്പുഴയില്‍ സ്‌കൂട്ടറില്‍ കെഎസ്ആർടിസി ബസ് ഇടിച്ചുണ്ടായ അപകടത്തില്‍ ഐടി ജീവനക്കാരിയായ യുവതിക്ക് ദാരുണാന്ത്യം. ദേശീയപാതയില്‍ പാതിരപ്പള്ളി വടക്കാണ് അപകടം നടന്നത്. കൊച്ചി ഇൻഫോപാർക്കില്‍ സോഫ്റ്റ്‌വെയർ എൻജിനീയറായി ജോലി നോക്കുന്ന കിടങ്ങറ മുണ്ടുചിറ വീട്ടില്‍ പാർവതി ജഗദീഷാണ് (27) മരിച്ചത്.
കരുനാഗപ്പള്ളി സ്വദേശിയുമായി മെയ് 20 ന് വിവാഹ നിശ്ചയച്ചടങ്ങ് നടത്താൻ തീരുമാനിച്ചിരിക്കുകയായിരുന്നു. ഇതിനിടെയാണ് ദാരുണമായ അപകടം സംഭവിക്കുന്നത്. കഴിഞ്ഞ ദിവസം രാവിലെ ആറോടെയാണ് അപകടം. കൊച്ചിയില്‍ നിന്ന് അവധിക്ക് വീട്ടിലേക്ക് വരുമ്ബോഴായിരുന്നു അപകടം. ദേശീയ പാതയില്‍ റോഡ് പണി നടക്കുന്ന ഭാഗത്ത് വെച്ച്‌ എതിരെ വന്ന ബസ് പാർവതിയുടെ സ്‌കൂട്ടറില്‍ ഇടിക്കുകയായിരുന്നു.
അപകടം നടന്ന ഉടനെ തന്നെ പാർവ്വതിയെ ആലപ്പുഴ ജനറല്‍ ആശുപത്രിയിലും പിന്നീട് ആലപ്പുഴ മെഡിക്കല്‍ കോളജിലും പ്രവേശിപ്പിച്ചെങ്കിലും വൈകിട്ടോടെ ചികിതിസ്സയിലിരിക്കെ മരണം സംഭവിക്കുകയായിരുന്നു. വെളിയനാട് സർവീസ് സഹകരണ ബാങ്ക് മുൻപ്രസിഡന്റ് ജഗദീഷ് ചന്ദ്രന്റെയും ലതാ മോളുടെയും മകളാണ് പാർവതി. സഹോദരൻ: ജെ.കണ്ണൻ (ദുബായ്).
