ഓച്ചിറ: മാതാപിതാക്കളെയും സഹോദരിയെയും അപകടപ്പെടുത്തുമെന്നു ഭീഷണിപ്പെടുത്തി സ്കൂള് വിദ്യാര്ത്ഥിനിയെ പീഡിപ്പിച്ച കേസില് ഡിവൈഎഫ്ഐ പ്രവര്ത്തകന് അറസ്റ്റില്. ക്ലാപ്പനയിലെ ഡിവൈഎഫ്ഐ പ്രവര്ത്തകനായ ആംബുലന്സ് ഡ്രൈവറാണ് അറസ്റ്റിലായത്. പ്രയാര് തെക്ക് ആലുംപീടിക കോമളത്ത് മുരുകനെ (26) ആണ് കൊല്ലം മുണ്ടയ്ക്കലിലെ ഒളിത്താവളത്തില് നിന്നു ഓച്ചിറ പൊലീസ് പിടികൂടിയത്.
പെണ്കുട്ടിയുടെ കുടുംബവുമായി അടുപ്പമുണ്ടായിരുന്ന ഇയാള് കുട്ടിയോട് തന്റെ മാതാവിനെയും സഹോദരിയെയും പെട്രോള് ഒഴിച്ചു കത്തിക്കുമെന്നും പിതാവിനെ വാഹനം ഇടിച്ചു കൊലപ്പെടുത്തുമെന്നും ഭീഷണിപ്പെടുത്തിയാണ് പീഡിപ്പിച്ചതെന്നു പെണ്കുട്ടിയുടെ മൊഴിയില് പറയുന്നു. കഴിഞ്ഞ ദിവസം പൊലീസില് പരാതി കൊടുത്തതിനെത്തുടര്ന്നു മുരുകന്റെ നേതൃത്വത്തിലുള്ള സംഘം പെണ്കുട്ടിയുടെ വീടിനുനേരെ ആക്രമണം നടത്തിയിരുന്നു. കുടുംബം പൊലീസ് സംരക്ഷണം ആവശ്യപ്പെട്ടിട്ടുണ്ട്.
പെണ്കുട്ടിയെ സമൂഹ മാധ്യമത്തിലൂടെ അപകീര്ത്തിപ്പെടുത്താന് ശ്രമിച്ചതിനും കേസെടുത്തിട്ടുണ്ട്. എസ്എഫ്ഐ പ്രവര്ത്തകനായിരുന്ന സമയത്താണ് മുരുകന് പെണ്കുട്ടിയുടെ കുടുംബവുമായി അടുപ്പത്തിലാകുന്നത്. ഈ അടുപ്പം മുതലാക്കി ഇയാള് കുട്ടിയോട് അടുക്കുകയും ആരും അറിയാതെ ഭീഷണിപ്പെടുത്തുകയും ആയിരുന്നു.
ഒട്ടേറെ കേസുകളില് പ്രതിയായതിനെ തുടര്ന്നു ഡിവൈഎഫ്ഐ ക്ലാപ്പന ക്യൂബന് യൂണിറ്റിന്റെ നേതൃത്വത്തില് നിന്നു മുരുകനെ മാറ്റി നിര്ത്തിയതായി സംഘടനാനേതൃത്വം പറയുന്നു. എന്നാല്, കഴിഞ്ഞ ദിവസം ഡിവൈഎഫ്ഐയുടെ നേതൃത്വത്തില് ക്ലാപ്പനയില് നടത്തിയ രക്തസാക്ഷി ദിനാചരണത്തിലും മുരുകന് പങ്കെടുത്തിരുന്നു. സമൂഹമാധ്യമങ്ങളില് ഡിവൈഎഫ്ഐക്കു വേണ്ടി സജീവമാണ്. പ്രതിയെ റിമാന്ഡ് ചെയ്തു.