കണ്ടല ബാങ്ക് ക്രമക്കേട് കേസില്‍ കുറ്റാരോപിതനായി കസ്റ്റഡിയിലുള്ള മുൻ ബാങ്ക് പ്രസിഡന്റ് ഭാസുരാംഗന്റെ മകൻ അഖില്‍ ജിത്തിനെയും ഇഡി കസ്റ്റഡിയിലെടുത്തു. അഖില്‍ ജിത്തിനെ ബാങ്കിന്റെ ടൗണ്‍ ബ്രാഞ്ചില്‍ എത്തിച്ച്‌ തെളിവെടുത്തു. കണ്ടല ബാങ്കിൻറെ മാറനല്ലൂര്‍ ടൗണ്‍ ബ്രാഞ്ചില്‍ പരിശോധന നടക്കുകയാണ്. അഖില്‍ ജിത്തിന്റെ സാന്നിധ്യത്തിലാണ് പരിശോധന.
ലോക്കറുകള്‍ ഇഡി പരിശോധിക്കുകയാണ്. കേസില്‍ ഇഡിയുടെ നിര്‍ണ്ണായക നീക്കമാണ് ഇത്. കൂടുതല്‍ ഇഡി ഉദ്യോഗസ്ഥര്‍ കണ്ടല ബാങ്ക് ടൗണ്‍ ശാഖയില്‍ എത്തി. ബാങ്ക് ക്രമക്കേടില്‍ കുറ്റാരോപിതനായ ഭാസുരാംഗനെ സിപിഐ പുറത്താക്കിയിരുന്നു. ജില്ലാ എക്‌സിക്യൂട്ടീവാണ് ഭാസുരാംഗനെ പ്രാഥമികാംഗത്വത്തില്‍ നിന്നും പുറത്താക്കിയത്. ഗൗരവമുള്ള വിഷയമാണെന്ന് ബോധ്യപ്പെട്ടതിനാലാണ് നടപടിയെന്ന് നേതാക്കള്‍ പ്രതികരിച്ചു. ക്രമക്കേട് പുറത്ത് വന്നതിന് പിന്നാലെ രണ്ട് തവണ ഭാസുരാംഗനെതിരെ നടപടിയെടുത്തിരുന്നു. ജില്ലാ എക്‌സിക്യൂട്ടീവ് അംഗമായിരുന്ന ഭാസുരാംഗനെ നേരത്തെ പ്രാഥമിക അംഗത്വത്തിലേക്ക് തരം താഴ്ത്തിയായിരുന്നു രണ്ടാമത്തെ നടപടി. 15 വര്‍ഷമായി സിപിഐ അംഗമാണ് ഭാസുരാംഗന്‍.
മില്‍മയില്‍ നിന്നും പുറത്താക്കും: ഇതു സംബന്ധിച്ച്‌ ക്ഷീരവികസന വകുപ്പ് മന്ത്രി ജെ ചിഞ്ചുറാണി നിര്‍ദേശം നല്‍കി. ക്ഷീരസംഘം രജിസ്ട്രാര്‍ക്കാണ് നിര്‍ദേശം നല്‍കിയിരിക്കുന്നത്. നിലവില്‍ മില്‍മ തെക്കന്‍ മേഖല അഡ്മിനിസ്‌ട്രേറ്ററാണ് ഭാസുരാംഗൻ.101 കോടി രൂപയുടെ ക്രമക്കേടാണ് കണ്ടല ബാങ്കില്‍ കണ്ടെത്തിയത്. സിപിഐ നേതാവായ എന്‍ ഭാസുരാംഗനാണ് കഴിഞ്ഞ 30 വര്‍ഷത്തിലേറെയായി ബാങ്ക് പ്രസിഡണ്ട്. ഈയിടെയാണ് ഭരണ സമിതി രാജിവെച്ചത്. നിലവില്‍ അഡ്മിനിസ്ട്രേറ്റീവ് ഭരണമാണ് നടക്കുന്നത്. എന്‍ ഭാസുരാംഗന്‍ നേരത്തെ ക്ഷീരയിലും അഴിമതി നടത്തിയിരുന്നു. ക്ഷീര പ്ലാന്റ് ഇപ്പോള്‍ പ്രവര്‍ത്തിക്കുന്നില്ല.
