സര്‍ചാര്‍ജിനൊപ്പം ഡെപ്പോസിറ്റും പിടിച്ചു തുടങ്ങിയതോടെ വൈദ്യുതി ഉപഭോക്താക്കള്‍ക്ക് വന്‍ തിരിച്ചടി; പലരും അടയ്ക്കേണ്ടത് ഇരട്ടി തുക: നട്ടം തിരിഞ്ഞ് ഉപഭോക്താക്കൾ.

ഒരോ ഉപഭോക്താവിന്‍റെയും വൈദ്യുതി ബില്ലിന്‍റെ മൂന്നിരട്ടി തുകയാണ് ഡെപ്പോസിറ്റായി കെ.എസ്.ഇ.ബിയില്‍ നിലനിര്‍ത്തുന്നത്. അടുത്തിടെ വൈദ്യുതി ബില്ല് വര്‍ധിച്ചതോടെ ഭൂരിഭാഗം ഉപഭോക്താക്കളുടെയും ഡെപ്പോസിറ്റ് തുക കുറഞ്ഞു. നിലവില്‍ ലഭിച്ച ബില്ലിന്‍റെ മൂന്നിരട്ടി തുകയല്ല, ഇതില്‍ കുറവാണ് ഇപ്പോള്‍ പല ഉപഭോക്താക്കളുടെയും ഡെപ്പോസിറ്റായുള്ളത്. ഇതോടെയാണ് അധികതുക വാങ്ങാനുള്ള കെ.എസ്.ഇ.ബി തീരുമാനം.

ഡെപ്പോസ്റ്റ് തുക മൂന്നിരട്ടിയായി നിലനിര്‍ത്താനാണ് ഈ നടപടിയെന്നും കുറവ് വന്നവരില്‍നിന്ന് മാത്രമാണ് പണം ശേഖരിക്കുന്നതെന്നും കെ.എസ്.ഇ.ബി പറയുന്നു. വേനലില്‍ ഉപയോഗം കൂടിയതിനാല്‍ ബില്‍ തുക വര്‍ധിച്ചിരുന്നു. ഇതനുസരിച്ച്‌ ഡെപ്പോസ്റ്റ് നിശ്ചയിക്കുന്നതും തുക ഉയരാൻ കാരണമായി പറയുന്നു.ഇടത്തരം കുടുംബങ്ങള്‍ക്ക് 1000 മുതല്‍ 3000 രൂപ വരെയാണ് ഡെപ്പോസിറ്റായി അടക്കാൻ ആവശ്യപ്പെട്ടിരിക്കുന്നത്.

വൈദ്യുതി ചാര്‍ജിനൊപ്പം ഇതുകൂടി ചേരുന്നതോടെ വലിയ തുകയാണ് അടക്കേണ്ടിവരുന്നതെന്ന് ഉപഭോക്താക്കള്‍ പറയുന്നു. കൃത്യമായ വിശദീകരണം നല്‍കാൻ കെ.എസ്.ഇ.ബി തയാറാകുന്നില്ലെന്നും ഇവര്‍ കുറ്റപ്പെടുത്തുന്നു. വൻ തുകയാണ് അപ്രതീക്ഷിതമായി ലഭിച്ചതെന്ന് വ്യാപാരികളും പറയുന്നു. അതിനിടെ, വൈദ്യുതി സര്‍ചാര്‍ജ് ഈടാക്കുന്നത് തുടരുകയാണ്.

യൂനിറ്റിന് ഒമ്ബതുപൈസ ഈടാക്കാനായിരുന്നു ആദ്യം സംസ്ഥാന വൈദ്യുതി റെഗുലേറ്ററി കമീഷൻ അനുമതി നല്‍കിയിരുന്നത്. 1000 വാട്സുവരെ കണക്ടഡ് ലോഡുള്ളതും പ്രതിമാസം 40 യൂനിറ്റില്‍ത്താഴെ ഉപഭോഗമുള്ളതുമായ ഗാര്‍ഹികോപഭോക്താക്കളെ സര്‍ചാര്‍ജില്‍നിന്ന് ഒഴിവാക്കിയിരുന്നു.കഴിഞ്ഞ വര്‍ഷം ഏപ്രില്‍ ഒന്നുമുതല്‍ ജൂണ്‍ 30 വരെ പുറത്തുനിന്ന് വൈദ്യുതി വാങ്ങിയതിന് ബോര്‍ഡിന് അധികം ചെലവായ 87.07 കോടി രൂപയാണ് ഇത്തരത്തില്‍ പിരിച്ചെടുക്കുന്നത്.

ഇവിടെ ക്ലിക്ക് ചെയ്ത് ഞങ്ങളുടെ യൂട്യൂബ് ചാനൽ സബ്സ്ക്രൈബ് ചെയ്യുക