റിലയന്സ് ജിയോയുടെ 5ജി സേവനങ്ങള്ക്ക് കേരളത്തില് ഇന്ന് തുടക്കം. കൊച്ചി നഗരത്തിലാണ് ഇന്ന് മുതല് സേവനം ലഭിക്കുക. കൊച്ചി കോര്പറേഷന് പരിധിയില് ഇന്ന് വൈകീട്ട് മുതല് സേവനം ലഭിച്ചു തുടങ്ങും. മുഖ്യമന്ത്രി പിണറായി വിജയന് സേവനം ഉദ്ഘാടനം ചെയ്യും.
ആദ്യഘട്ടത്തില് തിരഞ്ഞെടുത്ത മേഖലകളിലാണ് 5ജി ലഭ്യമാക്കുന്നത്. റിലയന്സ് ജിയോ ആണ് 5 ജിയുമായി കേരളത്തില് ആദ്യമെത്തുന്നത്. കൊച്ചിയിലെ സ്വകാര്യ ഹോട്ടലില് നടക്കുന്ന ഉദ്ഘാടനത്തിന് ശേഷം 5 ജി വിദ്യാഭ്യാസ, മെഡിക്കല്, തൊഴില് മേഖലയിലടക്കം വരുത്തുന്ന മാറ്റങ്ങള് എന്തൊക്കെ എന്നതില് വിശദമായ അവതരണവും നടക്കും.
തിരഞ്ഞെടുത്ത മേഖലയിലെ തിരഞ്ഞെടുത്ത വ്യക്തികള്ക്ക് വരുന്ന ഏതാനും ദിവസം ട്രയല് റണ്ണായി ആണ് 5ജി കിട്ടുക. അതിന് ശേഷം കൂടുതല് സ്ഥലങ്ങളില് കൂടുതല് വ്യക്തികളിലേക്ക് 5ജി എത്തും. 4ജിയേക്കാള് 10 ഇരട്ടി വരെ ഡാറ്റാ വേഗതയാണ് 5ജിയില് പ്രതീക്ഷിക്കുന്നത്.
നിലവില് 5ജി ഫോണുള്ളവര്ക്ക് കാര്യങ്ങള് എളുപ്പമാണ്. ഫോണിലെ സെറ്റിങ്സില് മാറ്റം വരുത്തിയാല് മതി. സിം കാര്ഡില് ഒരു മാറ്റവും വരുത്തേണ്ടതില്ല. ഒക്ടോബര് മുതലാണ് റിലയന്സ് ജിയോ 5 ജി സേവനങ്ങള് രാജ്യത്ത് ലഭ്യമാക്കി തുടങ്ങിയത്. പരീക്ഷണാടിസ്ഥാനത്തില് മുംബൈ, ഡല്ഹി,കൊല്ക്കത്ത നഗരങ്ങളിലാണ് സേവനങ്ങള് ലഭ്യമാക്കിയത്. ശേഷം മറ്റു സംസ്ഥാനങ്ങളിലേക്കും വ്യാപിപ്പിക്കുകയായിരുന്നു. ഡിസംബര് അവസാനത്തോടെ, രാജ്യത്തെ എല്ലാ താലൂക്കുകളിലും 5 ജി സേവനങ്ങള് ലഭ്യമാക്കുമെന്ന് റിലയന്സ് പ്രഖ്യാപിച്ചിരുന്നു.