ടൊയോട്ടയും മാരുതി സുസുക്കിയും പങ്കാളികളായതോടെ, എല്ലാ ടൊയോട്ട മോഡലുകളും മാരുതി റീബാഡ്ജ് ചെയ്യുമെന്നായിരുന്നു റിപോര്‍ട്ടുകള്‍. റീബാഡ്ജ് ചെയ്‌ത ഫോര്‍ച്യൂണര്‍, ഇന്നോവ അല്ലെങ്കില്‍ ഹിലക്സ് ഏതെല്ലാം പ്രതീക്ഷിച്ചിരുന്ന വാഹനപ്രേമികള്‍ക്ക് ആവേശകരമായ വാര്‍ത്തയുമായി ടൊയോട്ട. അടുത്ത തലമുറ ഇന്നോവ ഹൈക്രോസ് മാരുതി സുസുക്കിക്കായി റീബാഡ്ജ് ചെയ്യും എന്നാണ് പുതിയ റിപോര്‍ട്ടുകള്‍.
ഇന്നോവ ഹൈക്രോസ് നവംബറില്‍ പുറത്തിറക്കാനാണ് ടൊയോട്ട തയ്യാറെടുക്കുന്നത്. ഇന്നോവ നെയിംപ്ലേറ്റ് ആദ്യമായി മോണോകോക്ക് പ്ലാറ്റ്‌ഫോമിനെ അടിസ്ഥാനമാക്കിയുള്ളതിനാല്‍ നിലവിലുള്ള ക്രിസ്റ്റയില്‍ നിന്ന് തികച്ചും വ്യത്യസ്തമായ പതിപ്പായിരിക്കും ഇത്. കൂടാതെ, ജനപ്രിയ എംപിവിയുടെ മറ്റൊരു പ്രതേകത ശക്തമായ ഹൈബ്രിഡ് പവര്‍ട്രെയിനിന്റെ സാന്നിധ്യമായിരിക്കും.
190PS-ല്‍ കൂടുതല്‍ കരുത്ത് പകരാന്‍ സാധ്യതയുള്ള ഒരു ഇലക്‌ട്രിക് മോട്ടോറുമായി ചേര്‍ന്ന് 2-ലിറ്റര്‍ പെട്രോള്‍ എഞ്ചിന്‍ ആയിരിക്കും ഇത്. റിയര്‍ വീല്‍ ഡ്രൈവ് മാത്രമായിരുന്ന ഇന്നോവയുടെ നിലവിലെ പതിപ്പില്‍ നിന്ന് വ്യത്യസ്തമായി ഈ പവര്‍ട്രെയിന്‍ ഫ്രന്റ് വീല്‍ സ്പിനും സാധ്യമാക്കും. ഓഫറില്‍ ഡീസല്‍ എഞ്ചിന്‍ ഉണ്ടാകില്ല എന്നാണ് റിപോര്‍ട്ടുകള്‍. ഇന്നോവ ഹൈക്രോസിനും മാരുതിയുടെ എംപിവി പതിപ്പിനും ഏകദേശം 20 ലക്ഷം രൂപ (എക്‌സ്-ഷോറൂം) ആരംഭിക്കാന്‍ സാധ്യതയുണ്ട്, ഇത് കിയ കാരന്‍സ്, മഹീന്ദ്ര മരാസോ എന്നിവയ്‌ക്ക് ഒരു പ്രീമിയം ബദലായിരിക്കും.
