ന്യൂഡല്ഹി: മീഡിയ വണ് ചാനലിന്റെ സംപ്രേഷണം വിലക്കിയ നടപടി ശരിവെച്ച ഹൈക്കോടതി വിധിക്ക് സുപ്രീം കോടതിയുടെ സ്റ്റേ. ജസ്റ്റിസ് ഡിവൈ ചന്ദ്രചൂഡ് അധ്യക്ഷനായ ബെഞ്ചിന്റേതാണ് വിധി. സംപ്രേഷണ വിലക്ക് ശരിവെച്ച ഹൈക്കോടതി വിധിക്ക് പിന്നാലെയാണ് ഇടക്കാല ഉത്തരവ് തേടി മീഡിയ വണ് സുപ്രീം കോടതിയെ സമീപിച്ചത്.
‘മാധ്യമം ബ്രോഡ്കാസ്റ്റിംഗ് ലിമിറ്റഡിന്റെ സുരക്ഷാ ക്ലിയറന്സ് റദ്ദാക്കിയ കേന്ദ്രസര്ക്കാര് ഉത്തരവ് സ്റ്റേ ചെയ്തതായി വിധിക്കുന്നു. ഹര്ജിക്കാര്ക്ക് മീഡിയ വണ് സുരക്ഷാ ക്ലിയറന്സ് റദ്ദാക്കുന്നതിന് മുമ്ബുള്ള അതേ അടിസ്ഥാനത്തില് നടത്താം,’കോടതി പറഞ്ഞു. വിലക്കിന് സുരക്ഷാ കാരണങ്ങള് ചൂണ്ടിക്കാട്ടുന്ന ഇന്റലിജന്സ് റിപ്പോര്ട്ട് എന്താണെന്ന് അറിയാന് ഹര്ജിക്കാര്ക്ക് അവകാശമുണ്ടെന്നും കോടതി നിരീക്ഷിച്ചു. വിഷയത്തില് കേന്ദ്രത്തിന് രണ്ടാഴ്ചക്കകം എതിര് സത്യവാങ് മൂലം ഫയല് ചെയ്യാം.
ആഭ്യന്തര മന്ത്രാലയത്തിന്റെ സുരക്ഷാ ക്ലിയറന്സില്ലെന്നതിന്റെ പേരിലായിരുന്നു ചാനലിന്റെ സംപ്രേഷണം വാര്ത്താവിതരണ പ്രക്ഷേപണ മന്ത്രാലയം ജനുവരി 31ന് വിലക്കിയത്. ഇതിന് എതിരെ മാധ്യമം ബ്രോഡ്കാസ്റ്റിങ് ലിമിറ്റഡ് നല്കിയ ഹര്ജി ഹൈക്കോടതിയുടെ സിംഗിള് ബെഞ്ചും ഡിവിഷന് ബെഞ്ചും തള്ളിയിരുന്നു.
സംപ്രേഷണ വിലക്ക് ശരിവെച്ച കേരള ഹൈക്കോടതി വിധിക്കെതിരെ മാധ്യമം ബ്രോഡ്കാസ്റ്റിംഗ് ലിമിറ്റഡ് നല്കിയ ഹര്ജിക്ക് പുറമെ കേരള പത്രപ്രവര്ത്തക യൂണിയനും ചാനലിലെ ജീവനക്കാര്ക്ക് വേണ്ടി എഡിറ്റര് പ്രമോദ് രാമനും കോടതിയില് അപ്പീല് നല്കിയിരുന്നു.