എഎപി എംഎൽഎ ബൽജീന്ദർ കൗറിനെ ഭർത്താവ് മർദിക്കുന്ന വീഡിയോ സോഷ്യൽ മീഡിയയിൽ വൈറലാകുന്നു. ജൂലായ് 10-ലെ 50 സെക്കൻഡ് ദൈർഘ്യമുള്ള വീഡിയോയിൽ, വിശദീകരിക്കാത്ത ചില പ്രശ്നങ്ങളുടെ പേരിൽ കൗറിനെ ഭർത്താവ് മർദിക്കുന്നതായി കാണുന്നു.
തൽവണ്ടി സാബോയിലെ വീട്ടിൽ നിന്നുള്ള സി.സി.ടി.വി. ദൃശ്യങ്ങൾ വൈറലായിട്ടുണ്ട്. വൈറലായ വീഡിയോയോട് എംഎൽഎയും ഭർത്താവും ഇതുവരെ പ്രതികരിച്ചിട്ടില്ലെങ്കിലും സ്വമേധയാ നോട്ടീസ് നൽകുമെന്ന് പഞ്ചാബ് വനിതാ കമ്മീഷൻ അധ്യക്ഷ മനീഷ ഗുലാത്തി മാധ്യമങ്ങളോട് പറഞ്ഞു. “വിദ്യാഭ്യാസമുള്ള, തിരഞ്ഞെടുക്കപ്പെട്ട ഒരു നിയമസഭാംഗം ഗാർഹിക പീഡനത്തിന് ഇരയായാൽ പ്രതികരിക്കാൻ ശേഷിയില്ലാത്ത നൂറുകണക്കിന് സ്ത്രീകൾക്ക് എന്ത് സംഭവിക്കുമെന്ന് സങ്കൽപ്പിക്കുക,” ഗുലാത്തി പറഞ്ഞു. സംഭവത്തെക്കുറിച്ച് സംസാരിക്കാൻ എംഎൽഎ തയ്യാറായിട്ടില്ല.
“ഇതൊരു അസ്വസ്ഥതയുളവാക്കുന്ന വീഡിയോയാണ്. കുടുംബപ്രശ്നമാണെങ്കിൽ അത് കുടുംബത്തിനുള്ളിൽ തന്നെ പരിഹരിക്കണം. തിരഞ്ഞെടുക്കപ്പെട്ട ഒരു വനിതാ നേതാവ് ഇതിലൂടെ കടന്നുപോകുന്നത് ദൗർഭാഗ്യകരമാണ്. സ്ത്രീശാക്തീകരണത്തെക്കുറിച്ച് വീമ്പിളക്കിയാണ് എഎപി അധികാരത്തിലെത്തിയത്. സർക്കാർ എന്ന നിലയിൽ അവർ അത് അഭിസംബോധന ചെയ്യുകയും ഈ സംസ്ഥാനത്തെ യുവാക്കൾക്ക് തെറ്റായ പ്രതിച്ഛായ ലഭിക്കില്ലെന്ന് ഉറപ്പാക്കുകയും വേണം,” പ്രതിപക്ഷ നേതാവ് പ്രതാപ് ബജ്‌വ പറഞ്ഞു.
എഎപിയുടെ ദേശീയ എക്‌സിക്യൂട്ടീവിലെ അംഗവും പഞ്ചാബിലെ പാർട്ടിയുടെ വനിതാ വിഭാഗം പ്രസിഡന്റുമാണ് കൗർ എന്നാണ് എഎപി വെബ്‌സൈറ്റ് പറയുന്നത്. ഇന്ത്യ എഗെയ്ൻസ്റ്റ് കറപ്ഷൻ മൂവ്‌മെന്റിൽ ചേർന്ന ശേഷം അവർ ആം ആദ്മി പാർട്ടിയിൽ ചേരുകയും 2017 ലെ പഞ്ചാബ് തിരഞ്ഞെടുപ്പിൽ തൽവണ്ടി സാബോ മണ്ഡലത്തിൽ നിന്ന് മത്സരിക്കുകയും 19,293 വോട്ടുകൾക്ക് വിജയിക്കുകയും ചെയ്തു. രാഷ്ട്രീയത്തിൽ ചേരുന്നതിന് മുമ്പ് ഫത്തേഗഡ് സാഹിബിലെ മാതാ ഗുജ്രി കോളേജിൽ ഇംഗ്ലീഷ് അധ്യാപികയായിരുന്നു.
