“ഇ പി ജയരാജൻ എന്ന വന്മരത്തിനെതിരെ മഴുവെറിഞ്ഞപ്പോൾ കണ്ണൂരിലെ ആക്രമണങ്ങൾ കുറഞ്ഞു”: കെ റെയിലിൽ സിപിഎം ഉന്നതർക്കെതിരെ കോൺഗ്രസ് മഴു എറിയുമോ – കൗണ്ടർ പോയിന്റിൽ ബി ആർ എം ഷഫീർ ഉദ്ദേശിച്ചത് എന്ത്?

കണ്ണൂരിൽ സർവേയിൽ പ്രതിഷേധവുമായി എത്തിയ കോൺഗ്രസ് നേതാക്കൾക്കും പ്രവർത്തകർക്കും എതിരെ സിപിഎം നേതാക്കളുടെ നേതൃത്വത്തിൽ ആക്രമണം അഴിച്ചു വിട്ടിരുന്നു. പോലീസിനെ മാറ്റിനിർത്തി സർവ്വേ മുന്നോട്ടു കൊണ്ടുപോകുവാൻ പാർട്ടിക്കാർ ഇറങ്ങിയാൽ കേരളത്തിലെ ക്രമസമാധാനനില തകരാറിൽ ആകുവാൻ സാധ്യതയുണ്ട്. ഇതിന് വ്യക്തമായ കാരണങ്ങളുമുണ്ട്.

1.തുടർ ഭരണം ലഭിച്ച സിപിഎമ്മിനെതിരെ ശക്തമായ ജനവികാരം ഉയർന്നുവരുന്ന വിഷയമാണ് കെ റെയിൽ. കോൺഗ്രസ് ഉയർത്തുന്ന പ്രതിഷേധത്തിന് പൊതുസമൂഹത്തിൽ വലിയ വിഭാഗത്തിൽനിന്ന് പിന്തുണയും ലഭിക്കുന്നുണ്ട്.

2.തൻറെ മുൻഗാമികളിൽ നിന്ന് വ്യത്യസ്തനായി അടിക്ക് തിരിച്ചടി എന്ന സ്വന്തം ശൈലിയിൽ പാർട്ടിയെ മുന്നോട്ടുകൊണ്ടുപോകാൻ ആഗ്രഹിക്കുന്ന ആളാണ് നിലവിലെ കെപിസിസി പ്രസിഡൻറ് കെ സുധാകരൻ.

3.കെ റെയിൽ സമരത്തെ നേരിടുവാൻ സിപിഎം ആക്രമ പാത സ്വീകരിക്കുന്നു എന്ന് കഴിഞ്ഞ ദിവസത്തെ സംഭവങ്ങൾ വ്യക്തമാക്കുന്നു.

4.സുധാകര വീര്യം ഏറ്റെടുത്ത കോൺഗ്രസ് അണികളും കേരളത്തിലെ വിവിധ ജില്ലകളിൽ പതിവ് ശൈലിയിൽ നിന്ന് വ്യത്യസ്തമായി അക്രമോത്സുകമായി തന്നെയാണ് സമരമുഖത്ത് ഉള്ളത്.

ഏതായാലും ഒരു കാര്യം വ്യക്തമാണ്. കെ റെയിൽ പദ്ധതിയുമായി സർക്കാർ മുന്നോട്ട് പോയാൽ അത് കേരളത്തിൽ രാഷ്ട്രീയ പ്രകമ്പനങ്ങൾ സൃഷ്ടിക്കും. ക്രമസമാധാനനില താറുമാറാകാൻ ഇടയുണ്ട്. വലിയ രീതിയിലുള്ള ജനരോഷം മുതലെടുക്കുവാൻ പ്രതിപക്ഷ പാർട്ടികൾ തന്ത്രങ്ങൾ മെനയും. പിണറായി വിജയന്റെ സ്വപ്ന പദ്ധതി യാഥാർത്ഥ്യമാക്കുവാൻ സിപിഎം കടുത്ത നിലപാടുകൾ കൈക്കൊള്ളും. ഇങ്ങനെയൊക്കെ സംഭവിച്ചാൽ സ്വാഭാവികമായും കെ റയിൽ കേരളത്തെ ഒരു കലാപ ഭൂമിയാക്കി മാറ്റും.