ലഖ്‌നൗ: ഉത്തര്‍പ്രദേശിലെ മെയിന്‍പുരിയില്‍ നാടന്‍ തോക്കുമായി(country-made pistol) അധ്യാപിക അറസ്റ്റില്‍(Arrest). ഫിറോസാബാദിലെ സ്‌കൂളില്‍ അധ്യാപികയായ കരിഷ്മ സിങ് യാദവിനെയാണ് മെയിന്‍പുരിയില്‍നിന്ന് പോലീസ് പിടികൂടിയത്. രഹസ്യ വിവരത്തിന്റെ അടിസ്ഥാനത്തില്‍ നടത്തിയ പൊലീസ് പരിശോധനയിലാണ് യുവതി പിടിയിലായത്.
പൊലീസ് നടത്തിയ ദേഹ പരിശോധനയിലാണ് യുവതിയുടെ പാന്റിന്റെ പോക്കറ്റില്‍ നിന്ന് തോക്ക് കണ്ടെത്തിയത്. സംഭവത്തില്‍ യുവതിയെ അറസ്റ്റ് ചെയ്യുകയും വിവിധ വകുപ്പുകള്‍ പ്രകാരം കേസെടുത്തതായും പൊലീസ് വ്യക്തമാക്കി. ഫിറോസാബാദില്‍ അധ്യാപികയായ കരിഷ്മ ചില ജോലികള്‍ക്കായാണ് മെയിന്‍പുരിയില്‍ വന്നതെന്നാണ് മൊഴി നല്‍കിയിരിക്കുന്നത്.
എന്നാല്‍ എന്തിനാണ് യുവതി തോക്ക് കൈവശം വെച്ചത് എന്നതടക്കം ദുരൂഹമായി തുടരുകയാണ്. ഇക്കാര്യം അന്വേഷിച്ചുവരികയാണെന്നും ഇവരെ വിശദമായി ചോദ്യം ചെയ്യണമെന്നും പൊലീസ് അധികൃതര്‍ അറിയിച്ചു. അതേസമയം യുവതിയെ പരിശോധിക്കുന്നതിന്‍െയും തോക്ക് പിടിച്ചെടുക്കുന്നതിന്റെയും ദൃശ്യങ്ങള്‍ സമൂഹമാധ്യമങ്ങളില്‍ പ്രചരിക്കുന്നുണ്ട്.
