ആലപ്പുഴ: അപ്പത്തിനും മുട്ടറോസ്റ്റിനും അമിത വില ഈടാക്കിയെന്ന പി പി ചിത്തരഞ്ജന് എംഎല്എയുടെ പരാതി ഫലം കണ്ടു. ഫാന് സ്പീഡ് കൂട്ടിയിട്ടാല് പറന്നുപോകുന്ന വലിപ്പത്തിലുള്ള ഒരപ്പത്തിന് 15 രൂപയും നാലര രൂപ വില വരുന്ന ഒരു മുട്ടയും അല്പം ഗ്രേവിയും നല്കിയതിന് 50 രൂപയും ഈടാക്കിയെന്നായിരുന്നു എംഎല്എ ഉയര്ത്തിയ പരാതി.
ഈ വിഷയത്തില് ജില്ലാ കളക്ടര്ക്കും പരാതി നല്കിയതോടെ സാമൂഹ്യ മാധ്യമങ്ങളില് ഉള്പ്പെടെ വിഷയം വലിയ ചര്ച്ചയായി മാറി. എംഎല്എ ഭക്ഷണം കഴിച്ചതിന് പണം നല്കിയില്ലെന്നത് ഉള്പ്പെടെ ചര്ച്ചകളിലേക്ക് വിഷയം മാറുകയായിരുന്നു. സംഭവത്തില് ആക്ഷേപവുമായി പല കോണ്ഗ്രസ് നേതാക്കളും രംഗത്തെത്തിയിരുന്നു.
ഇപ്പോള് എംഎല്എയുടെ പരാതിയില് പറയുന്ന ഹോട്ടലില് മുട്ട റോസ്റ്റിന്റെയും അപ്പത്തിന്റെയും വില കുറച്ചതായുള്ള വിവരങ്ങളാണ് പുറത്ത് വന്നിട്ടുള്ളത്. സിംഗിള് മുട്ട റോസ്റ്റിന് 50 രൂപയില് നിന്ന് 40 ആക്കിയാണ് വില കുറച്ചിട്ടുള്ളത്. മെനു കാര്ഡില് 50 രൂപ എന്നുള്ളത് വെട്ടി 40 ആക്കിയിട്ടുമുണ്ട്. അപ്പത്തിന് അഞ്ച് രൂപ കുറച്ച് പത്ത് ആക്കിയെന്നും ഹോട്ടല് ഉടമ അറിയിച്ചു.
നേരത്തേ അപ്പത്തിനും മുട്ടറോസ്റ്റിനും അമിത വില ഈടാക്കിയെന്ന ചിത്തരഞ്ജന് എംഎല്എയുടെ പരാതിയില് ഹോട്ടലുടമ മറുപടി നല്കിയിരുന്നു. സാധാരണ മുട്ടറോസ്റ്റില് നിന്ന് വ്യത്യസ്തമാണ് തങ്ങളുടെ മുട്ടറോസ്റ്റെന്നും അതില് അണ്ടിപ്പരിപ്പും മുന്തിരിയുമടക്കം ചേര്ത്താണ് ഉണ്ടാക്കുന്നതെന്നുമായിരുന്നു ഹോട്ടല് ഉടമയുടെ പ്രതികരണം. മുട്ട റോസ്റ്റിനു 50 രൂപ ഈടാക്കിയ ഹോട്ടലിനെതിരേ എംഎല്എ കളക്ടര്ക്കു നല്കിയ പരാതി അന്വേഷിക്കാനെത്തിയ ഉദ്യോഗസ്ഥര്ക്കാണ് ഹോട്ടലുടമ വിശദാകരണം നല്കിയത്.
ഹോട്ടല് ബില്ല് വിവാദത്തില് ജില്ലാ ഭരണകൂടത്തിന് നടപടിയെടുക്കാന് കഴിയില്ലെന്ന് കളക്ടര് വ്യക്തമാക്കിയിരുന്നു. പി പി ചിത്തരഞ്ജന് എംഎല്എ ഭക്ഷണം കഴിച്ച ഹോട്ടലില് വില കൂടുതല് ആയിരുന്നുവെന്ന് ജില്ലാ സപ്ലൈ ഓഫീസറുടെ റിപ്പോര്ട്ട് കിട്ടി. എന്നാല്, നിയമപരമായ നടപടിക്ക് ജില്ലാ ഭരണകൂടത്തിന് അധികാരമില്ലെന്ന് കളക്ടര് അറിയിച്ചു.
ഹോട്ടല് ഭക്ഷണ വില നിയന്ത്രണത്തിന് പുതിയ ബില്ലിന്റെ സാധ്യത പരിശോധിക്കുമെന്ന് ഭക്ഷ്യമന്ത്രി ജി ആര് അനില് അറിയിച്ചു. ചിത്തരഞ്ജന് എം എല് എയുടെ പരാതിയുമായി ബന്ധപ്പെട്ടാണ് മന്ത്രി പുതിയ ബില്ലിന്റെ സാധ്യതയെക്കുറിച്ച് പറഞ്ഞത്. നിലവില് വില നിശ്ചയിക്കാനുള്ള അധികാരം ഹോട്ടലുടമക്കാണെന്നും പ്രദര്ശിപ്പിച്ച വിലയേക്കാള് കൂടുതല് ഈടാക്കിയിട്ടുണ്ടെങ്കില് നടപടി ഉണ്ടാകുമെന്നും മന്ത്രി വ്യക്തമാക്കി.
ഹോട്ടല് ബില്ല് വിവാദത്തില് വിശദീകരണവുമായി ചിത്തരഞ്ജന് എംഎല്എ രംഗത്ത് വന്നിരുന്നു. ഹോട്ടല് ഭക്ഷണത്തിന് അമിതവില ഈടാക്കിയത് ചൂണ്ടിക്കാട്ടിയ തന്നെ ട്രോളുകള് ഉണ്ടാക്കി അപഹസിക്കുന്നെന്ന് ചിത്തരഞ്ജന് കുറ്റപ്പെടുത്തി. ചിലര് വ്യക്തഹത്യ ചെയ്യുകയാണ്. താന് പ്രതികരിച്ചത് ദുര്വ്യാഖ്യാനം ചെയ്യപ്പെടുന്നു. ട്രോളുകള്ക്ക് പിന്നില് ഹോട്ടലുടമ തന്നെയാകാം. കഴിച്ച ഭക്ഷണത്തിന്റെ പണം നല്കിയിട്ട് തന്നെയാണ് മടങ്ങിയതെന്നും എംഎല്എ വ്യക്തമാക്കി.
ഓസിന് കഴിക്കുന്നവരാണ് തന്നെ ആക്ഷേപിക്കുന്നതെന്നും ചിത്തരഞ്ജന് എംഎല്എ ഏഷ്യാനെറ്റ് ന്യൂസിന്റെ നമസ്തേ കേരളത്തില് പറഞ്ഞു. ഭക്ഷണം കഴിച്ച ശേഷം താന് പണം നല്കിയില്ല എന്ന മുന് എംഎല്എ വി ടി ബല്റാമിന്റെ പരാമര്ശം അങ്ങേയറ്റം നിലവാരം കുറഞ്ഞതാണെന്നും പണം നല്കിയോ ഇല്ലയോ എന്ന് ഹോട്ടലിലെ സിസിടിവി ദൃശ്യങ്ങള് പരിശോധിച്ചാല് വ്യക്തമാകുമെന്നും ചിത്തരഞ്ജന് എംഎല്എ പറഞ്ഞു. മത്സ്യത്തൊഴിലാളിയുടെ മകനായ തന്റെ ധാര്മികരോഷമാണ് അമിത വിലയ്ക്ക് എതിരായ പരാതിയിലൂടെ പ്രകടിപ്പിച്ചതെന്നും അദ്ദേഹം കൂട്ടിച്ചേര്ത്തു. ഫേസ്ബുക്ക് പോസ്റ്റിലൂടെയാണ് എംഎല്എയുടെ വിശദീകരണം.