സ്വർണ്ണക്കടത്ത് പിടികൂടുവാൻ സഹായിച്ചാൽ കിട്ടുന്ന പ്രതിഫല കണക്കുകൾ.

പലരും വിവരങ്ങൾ നൽകുന്നുണ്ടെങ്കിലും അതൊന്നും നികുതിവെട്ടിപ്പ് പിടികൂടാൻ സഹായകരമായ വിവരങ്ങൾ അല്ലെന്നാണ് ജിഎസ്ടി വകുപ്പിന്റെ വിശദീകരണം. അതുകൊണ്ടാണ് ഒന്നര വർഷമായിട്ടും ഒരാൾക്കു പോലും പാരിതോഷികം നൽകാത്തത്. നികുതിവെട്ടിപ്പ് പിടികൂടാൻ നേതൃത്വം നൽകുന്ന ഉദ്യോഗസ്ഥർക്ക് പരമാവധി 2 ലക്ഷം രൂപ വരെ സമ്മാനം നൽകാനും വകുപ്പുണ്ട്. എന്നാൽ ഉദ്യോഗസ്ഥർക്കും ഈ പണം ലഭിച്ചിട്ടില്ല.

പിടികൂടിയത് കോടികളുടെ സ്വർണം

നികുതി വെട്ടിച്ചു സ്വർണം കടത്തുന്നതിനെക്കുറിച്ച് വിവരം നൽകുന്നവർക്ക് പാരിതോഷികം പ്രഖ്യാപിച്ച ശേഷമുള്ള ഒന്നര വർഷത്തിനിടെ സംസ്ഥാനത്ത് 247 കിലോഗ്രാമോളം സ്വർണം രേഖകളില്ലാതെ വിൽപനയ്ക്ക് എത്തിച്ചതു ജിഎസ്ടി വകുപ്പ് പിടികൂടിയിട്ടുണ്ട്. 2019–20 സാമ്പത്തിക വർഷത്തിൽ രേഖകളില്ലാത്തതിന് പിടിച്ചെടുത്തത് 87 കിലോഗ്രാം സ്വർണമാണ്. 133 കേസുകളിലായാണ് ഇത്രയും സ്വർണം പിടിച്ചത്. 8.98 കോടി രൂപ പിഴയായി ഈടാക്കി.

2020 ഏപ്രിൽ മുതൽ 2021 ഒക്ടോബർ വരെയുള്ള കാലയളവിൽ മറ്റു സംസ്ഥാനങ്ങളിൽ നിന്നു നികുതിയടയ്ക്കാതെ വിൽപനയ്ക്കെത്തിച്ച 160 കിലോഗ്രാം സ്വർണം പിടികൂടി. 215 കേസുകളിലായാണ് ഇത്രയും സ്വർണം ജിഎസ്ടി വകുപ്പ് പിടികൂടിയത്. ഇതിൽ 144 കേസുകളിൽ നികുതിയും പിഴയും ഈടാക്കി സ്വർണം വിട്ടുനൽകി. 71 കേസുകളിൽ ആവശ്യമായ രേഖകളില്ലാതെ കടത്തിയ സ്വർണം പിടിച്ചെടുത്തു. 6.87 കോടി രൂപയാണ് അതുവഴി സർക്കാരിന് ലഭിച്ചത്.