ഹൈദരാബാദ്: തെലുങ്ക് സിനിമ താരം ശാലു ചൗരസ്യയെ അജ്ഞാതന്‍ ആക്രമിച്ചതായി പരാതി. ടോണി ബഞ്ചാര പാര്‍ക്കിലെ കെ.ബി.ആര്‍ പാര്‍ക്കിന് സമീപം ഞായറാഴ്ച രാത്രിയിലായിരുന്നു സംഭവം. നടിയുടെ തലക്കും മുഖത്തും പരിക്കേറ്റു.
രാത്രി എട്ടരയോടെ പാര്‍ക്കിലെത്തിയ നടിയെ ആക്രമിക്കുകയും മൊബൈല്‍ ഫോണ്‍ തട്ടിയെടുക്കുകയുമായിരുന്നു. തന്‍റെ സമീപമെത്തി ഒരാള്‍ ബാഗും ആഭരണങ്ങളും ആവശ്യപ്പെട്ടു. ഇവ നല്‍കാന്‍ വിസമ്മതിച്ചതോടെ അയാള്‍ മുഖത്ത് അടിക്കുകയും കല്ലുകൊണ്ട് ആക്രമിക്കുകയുമായിരുന്നു. പിന്നീട് മൊബൈല്‍ ഫോണ്‍ തട്ടിയെടുത്ത് ഇയാള്‍ സ്ഥലംവിട്ടു -നടി പൊലീസിനോട് പറഞ്ഞു.
തലക്കും കണ്ണിന് സമീപവും പരിക്കേറ്റ നടിയെ സ്വകാര്യ ആശുപത്രിയില്‍ പ്രവേശിപ്പിച്ചു. നടിയുടെ പരാതിയില്‍ ബഞ്ചാര പൊലീസ് കേസ് രജിസ്റ്റര്‍ ചെയ്ത് അന്വേഷണം ആരംഭിച്ചു. പ്രതിയെ പിടികൂടാനായി സമീപത്തെ സി.സി.ടി.വി ദൃശ്യങ്ങളും പൊലീസ് ശേഖരിച്ചു. നിരവധി സെലിബ്രിറ്റികളും ബിസിനസുകാരും രാഷ്ട്രീയ നേതാക്കളും രാവിലെയും വൈകിട്ടും നടക്കാന്‍ ഇറങ്ങുന്ന സ്ഥലമാണ് കെ.ബി.ആര്‍. പാര്‍ക്ക്. നേരത്തേ പാര്‍ക്കില്‍ മാലപൊട്ടിക്കല്‍ ഉള്‍പ്പെടെയുള്ളവ റിപ്പോര്‍ട്ട് ചെയ്തിരുന്നു.
