ന്യൂഡല്‍ഹി: പത്മഭൂഷണ്‍ പുരസ്കാരം നേടിയ ഗുലാം നബി ആസാദിനെ അഭിനന്ദിച്ച്‌ കോണ്‍ഗ്രസ് നേതാക്കളായ കപില്‍ സിബലും ശശി തരൂരും. ഗുലാം നബിയെ അഭിനന്ദിക്കുമ്ബോള്‍ തന്നെ കോണ്‍ഗ്രസ് നേതൃത്വത്തിനെതിരായ വിമര്‍ശനം കൂടി ഉള്‍പ്പെടുന്നതാണ് സിബലിന്റെ ട്വീറ്റ്. പൊതുരംഗത്തെ ഗുലാം നബി ആസാദിന്റെ സംഭാവനകള്‍ രാജ്യം തിരിച്ചറിയുമ്ബോള്‍ കോണ്‍ഗ്രസിന് അദ്ദേഹത്തിന്റെ സേവനം ആവശ്യമില്ലെന്നത് വിരോധാഭാസമാണെന്ന് സിബല്‍ കുറിച്ചു.
ഗുലാം നബിക്ക് അഭിനന്ദനങ്ങള്‍. രാഷ്ട്രീയമായി മറുവശത്തു നില്‍ക്കുന്ന സര്‍ക്കാരാണെങ്കിലും, പൊതുരംഗത്തെ സേവനത്തെ അംഗീകരിക്കുനന്ത് നല്ലകാര്യമാണെന്ന് തരൂര്‍ അഭിപ്രായപ്പെട്ടു. നേരത്തെ ഗുലാം നബിയെ പരോക്ഷമായി വിമര്‍ശിച്ച്‌ കോണ്‍ഗ്രസ് നേതാവ് ജയ്റാം രമേശ് രംഗത്തു വന്നിരുന്നു. സിപിഎം നേതാവ് ബുദ്ധദേബ് ഭട്ടാചാര്യ പുരസ്കാരം നിരസിച്ചത് ചൂണ്ടിക്കാട്ടിയായിരുന്നു ജയറാം രമേശിന്റെ ട്വീറ്റ്.
ബുദ്ധദേബ് അടിമ (ഗുലാം) ആകാനല്ല ആസാദ് (സ്വാതന്ത്ര്യം) ആകാനാണ് തീരുമാനിച്ചതെന്നായിരുന്നു ജയറാം രമേശ് അഭിപ്രായപ്പെട്ടത്. കോണ്‍ഗ്രസ് നേതൃത്വത്തിനെതിരെ രംഗത്തുവന്ന ജി-23 നേതാക്കളിലുള്‍പ്പെട്ടവരാണ് ഗുലാം നബി ആസാദും കപില്‍ സിബലും ശശി തരൂരും.
