കണ്ണൂര്: ആറു മാസത്തിനുള്ളില് കോണ്ഗ്രസിന്റെ സംഘടനാ സംവിധാനം അടിമുടി പൊളിച്ചെഴുതുമെന്ന് കെപിസിസി പ്രസിഡന്റ് കെ.
സുധാകരന്. ഓരോ ജില്ലയിലും 2,500 വീതം കേഡര്മാരെ നിയമിക്കും. കേഡര്മാര്ക്ക് പരിശീലനം നല്കി ബൂത്തുകളുടെ ചുമതല ഏല്പ്പിക്കുമെന്നും അദ്ദേഹം പറഞ്ഞു. കണ്ണൂര് ഡിസിസി പ്രസിഡന്റിന്റെ സ്ഥാനാരോഹണ ചടങ്ങില് സംസാരിക്കുകയായിരുന്നു അദ്ദേഹം.
പാര്ട്ടി ദുര്ബലമായ സ്ഥലങ്ങളില് കേഡര്മാരുടെ നേതൃത്വത്തില് സംഘടനാശേഷി വര്ധിപ്പിക്കും. ആറുമാസം കൊണ്ട് കോണ്ഗ്രസില് അടിമുടി പൊളിച്ചെഴുത്തുണ്ടാകുമെന്നും കെ. സുധാകരന് പ്രഖ്യാപിച്ചു.
കോണ്ഗ്രസില് സംഘടന തെരഞ്ഞെടുപ്പ് ആവശ്യമാണ്. സംഘടന തെരഞ്ഞെടുപ്പ് നടക്കുമ്ബോള് പുതിയ മുഖങ്ങള് കടന്നുവരും. പാര്ട്ടിയുടെ പ്രതിച്ഛായ തല്ലിത്തകര്ക്കാന് ഇനി വയ്യ. മാറ്റങ്ങളില് എതിര്വികാരം തോന്നുന്ന ആരെങ്കിലുമുണ്ടെങ്കില് ക്ഷമിക്കണമെന്നും അദ്ദേഹം കൂട്ടിച്ചേര്ത്തു.
കെഎസ്യു അംഗത്വവിതരണവും തെരഞ്ഞെടുപ്പും പരിഹാസ്യമാണ്. കെഎസ്യു, യൂത്ത് കോണ്ഗ്രസ് തെരഞ്ഞെടുപ്പുകള് ഏറ്റെടുക്കാന് കെപിസിസി തയാറാണെന്നും സുധാകരന് പറഞ്ഞു. പിണറായി വിജയന് രണ്ടാമതും അധികാരത്തില് വന്നത് കോണ്ഗ്രസ് പ്രവര്ത്തകരുടെ മനോനില തകരാറിലാക്കി, മനക്കരുത്ത് ചോര്ത്തി.
പാര്ട്ടിയുടെ അടിത്തട്ടിലെ ദൗര്ബല്യം സര്വേ നടത്തിയപ്പോള് വ്യക്തമായതാണ്. ഗ്രൂപ്പിന്റെ ഭാഗമല്ലാത്തതു കൊണ്ട് മികച്ച നേതാക്കള്ക്ക് പോയകാലത്ത് സ്ഥാനങ്ങള് കിട്ടിയില്ല. പാര്ട്ടിക്കുള്ളിലെ സംഘടനാ തെരഞ്ഞെടുപ്പ് രണ്ടാം ഘട്ടത്തില് നടത്താനാണ് ആലോചനയെന്നും സുധാകരന് പറഞ്ഞു.