ദില്ലി: സുനന്ദ പുഷ്കര് കേസില് ശശി തരൂര് കുറ്റവിമുക്തന്. തരൂരിന് മേല് ആത്മഹത്യാ പ്രേരണാകുറ്റം നിലനില്ക്കില്ലെന്ന് ദില്ലി റോസ് അവന്യു കോടതി വിധിച്ചു.
ജഡ്ജി ഗീതാംഞ്ജലി ഗോയല് ആണ് വിധി പറഞ്ഞത്. കേസന്വേഷിച്ച ദില്ലി പൊലീസിന്റെ പ്രത്യേക സംഘം നല്കിയ കുറ്റപത്രമാണ് കോടതി തള്ളിയത്. തരൂരിനെതിരെ ആത്മഹത്യ പ്രേരണ, ഗാര്ഹിക പീഡനവും ക്രൂരതയും ചുമത്തിയായിരുന്നു പൊലീസ് കുറ്റപത്രം. എല്ലാ കുറ്റങ്ങളും കോടതി തള്ളി.
പൊലീസിനെതിരായ തരൂരിന്റെ വാദങ്ങള് അംഗീകരിച്ചാണ് കോടതിയുടെ ഉത്തരവ്. സുനന്ദ പുഷ്കര് ആത്മഹത്യ ചെയ്തതാണെന്ന് തെളിയിക്കാന് പൊലീസിന് കഴിഞ്ഞില്ല. അതുകൊണ്ട് തന്നെ ആത്മഹത്യ പ്രേരണക്കുള്ള കുറ്റം നിലനില്ക്കില്ല എന്ന തരൂരിന്റെ വാദം കോടതി അംഗീകരിച്ചു. വിവിധ മെഡിക്കല് ബോര്ഡുകളുടെ റിപ്പോര്ട്ടുകളും കോടതി കണക്കിലെടുത്തു.
സുനന്ദപുഷ്കറിന്റെ കുടുംബാംഗങ്ങളാരും പരാതി ഉന്നയിച്ചിട്ടില്ല എന്ന വാദവും കോടതി പരിഗണിച്ചു. ഉത്തരവിനെതിരെ പൊലീസിന് ഹൈക്കോടതിയെ സമീപിക്കാം. ഉത്തരവിന്റെ പകര്പ്പ് ഗാര്ഹിക പീഡന കേസുകൂടിയായതിനാല് പരസ്യപ്പെടുത്തുന്നില്ലെന്ന് കോടതി വ്യക്തമാക്കി.
നീതി ഉറപ്പാക്കിയതിന് ശശി തരൂര് കോടതിക്ക് നന്ദി അറിയിച്ചു. ഏഴ് വര്ഷമായി വിടാതെ തുടരുന്ന പേടിസ്വപ്നത്തിനാണ് അവസാനമായതെന്നും തരൂര് പ്രതികരിച്ചു. എല്ലാ ആരോപണങ്ങളെയും നേരിട്ട് ജുഡീഷ്യറിയില് താന് വിശ്വാസം അര്പ്പിച്ചു എന്നും പ്രസ്താവനയില് ശശി തരൂര് വ്യക്തമാക്കി.