ഗൂഗിള്‍ പിക്സല് 8 സീരീസ് ലോഞ്ചിംഗിന് തയ്യാറെടുത്തിരിയ്ക്കുകയാണ്. പിക്സല് 8, പിക്സല് 8 പ്രോ എന്നീ ഡിവൈസുകള്‍ അടങ്ങുന്ന ഈ സീരീസിന്റെ വിലയും സവിശേഷതകളും ഇപ്പോള്‍ ഓണ്‍ലൈനില്‍ ലീക്കായിരിക്കുകയാണ്. പ്രസ് റെന്‍ഡറുകളാണ് ഇപ്പോള്‍ ലീക്കായിരിക്കുന്നത്. ഗൂഗിള്‍ പിക്സല് 8 നാല് വ്യത്യസ്ത നിറങ്ങളില്‍ വരാന്‍ സാധ്യതയുണ്ട്. ഗൂഗിള്‍ പിക്സല് 8 പ്രോയ്ക്ക് മൂന്ന് വ്യത്യസ്ത കളര്‍ വേരിയന്റുകളായിരിക്കും ഉണ്ടായിരിക്കുക.
പിക്സല് ഫോണുകളില്‍ ഇതിനകം കണ്ടിട്ടുള്ള ഡിസൈനിലാണ് പുതിയ ഫോണുകളും പുറത്തിറങ്ങുകയെന്നാണ് ലീക്ക് റിപ്പോര്‍ട്ടുകള്‍ നല്‍കുന്ന സൂചനകള്‍. സൂക്ഷ്മമായ മാറ്റങ്ങള്‍ ഈ രണ്ട് ഡിവൈസുകളിലും പ്രതീക്ഷിക്കുന്നു. രണ്ട് ഫോണുകള്‍ക്കും സ്ലിം ബെസലുകളും പഞ്ച്-ഹോള്‍ നോച്ച്‌ ഡിസൈനും ഉണ്ടായിരിക്കും.
ലീക്കായ സവിശേഷതകള്‍ അനുസരിച്ച്‌ ഗൂഗിള്‍ പിക്സല് 8 സ്മാര്‍ട്ട്‌ഫോണില്‍ 6.17 ഇഞ്ച് ഫുള്‍ എച്ച്‌ഡി അമോലെഡ് ഡിസ്‌പ്ലേയാണുള്ളത്. 120HZ റിഫ്രഷ് റേറ്റും 2400×1080 പിക്സല് റെസല്യൂഷനുമുള്ള ഡിസ്‌പ്ലെയാണ് ഇത്. കൂടുതല്‍ പ്രീമിയം മോഡലായ പിക്സല് 8 പ്രോയില്‍ 3120×1440 പിക്സല് റെസല്യൂഷനുള്ള 6.7 ഇഞ്ച് ഒലെഡ് ഡിസ്‌പ്ലേയായിരിക്കും ഉണ്ടാവുക. ഗൂഗിള്‍ പിക്സല് 8 പോലെ, പിക്സല് 8 പ്രോയിലും 120 ഹെര്‍ട്‌സ് വരെ റിഫ്രഷ് റേറ്റ് ഉണ്ടായിരിക്കുമെന്നും റിപ്പോര്‍ട്ടുകള്‍ സൂചിപ്പിക്കുന്നു.
ഗൂഗിള്‍ പിക്സല് 8 രണ്ട് സ്റ്റോറേജ് വേരിയന്റുകളില്‍ പുറത്തിറങ്ങുമെന്നാണ് പ്രതീക്ഷിക്കുന്നത്. 8 ജിബി റാമും 128 ജിബി സ്റ്റോറേജുമുള്ള ബേസ് വേരിയന്റും 8 ജിബി റാമും 256 ജിബി സ്റ്റോറേജുമുള്ള ഹൈ എന്‍ഡ് വേരിയന്റുമായിരിക്കും ഫോണിനുണ്ടാവുക. ഗൂഗിള്‍ പിക്സല് 8 പ്രോയ്ക്ക് മൂന്ന് സ്റ്റോറേജ് വേരിയന്റുകളുണ്ടാകുമെന്നും പ്രതീക്ഷിക്കുന്നു. 12 ജിബി റാം + 128 ജിബി, 12 ജിബി റാം + 256 ജിബി, 12 ജിബി റാം + 512 ജിബി എന്നിവയായിരിക്കും പിക്സല് 8 പ്രോയുടെ വേരിയന്റുകള്‍.
ഗൂഗിള്‍ പിക്സല് 8 സീരീസിലെ രണ്ട് സ്മാര്‍ട്ട്ഫോണുകളും 50 മെഗാപിക്‌സല്‍ പ്രൈമറി റിയര്‍ ക്യാമറയുമായി വരുമെന്ന് പ്രതീക്ഷിക്കുന്നു. പിക്സല് 8ല്‍ അള്‍ട്രാ വൈഡ് ആംഗിള്‍ ഷോട്ടുകള്‍ക്കായി സോണി IMX386 സെന്‍സറടങ്ങുന്ന ഡ്യുവല്‍ ക്യാമറ സെറ്റപ്പ് പ്രതീക്ഷിക്കാം. ഗൂഗിള്‍ പിക്സല് 8 പ്രോയില്‍ 64 മെഗാപിക്‌സല്‍ സെക്കന്ററി ക്യാമറയും 48 മെഗാപിക്‌സല്‍ അള്‍ട്രാ വൈഡ് ആംഗിള്‍ ക്യാമറയുമടങ്ങുന്ന ട്രിപ്പിള്‍ ക്യാമറ സെറ്റപ്പ് ആയിരിക്കും ഉണ്ടായിരിക്കുക. രണ്ട് ഫോണുകളിലും 11 മെഗാപിക്‌സല്‍ ഫ്രണ്ട് ക്യാമറ സെന്‍സറുണ്ടാകുമെന്നാണ് പുറത്ത് വന്ന റിപ്പോര്‍ട്ടുകള്‍ നല്‍കുന്ന സൂചനകള്‍.
ഗൂഗിള്‍ പിക്സല് 8 സ്മാര്‍ട്ട്‌ഫോണിന് 799 യൂറോ മുതലായിരിക്കും വിലയെന്നാണ് റിപ്പോര്‍ട്ടുകള്‍ നല്‍കുന്ന സൂചനകള്‍. ഇത് ഇന്ത്യന്‍ കറന്‍സിയില്‍ ഏകദേശം 70,200 രൂപയോളം വരും. അതേസമയം ഗൂഗിള്‍ പിക്സല് 8 പ്രോയുടെ വില 1099 യൂറോ മുതല്‍ ആരംഭിക്കും. ഇത് ഇന്ത്യന്‍ കറന്‍സിയില്‍ ഏകദേശം 96,500 രൂപയോളമായിരിക്കും.
