ന്യൂഡൽഹി: ബോളിവുഡ് താരങ്ങളായ ഷാറൂഖ് ഖാനും കത്രീന കൈഫിനും കോവിഡ് സ്ഥിരീകരിച്ചു. ഷാറൂഖിന് വേഗം സുഖം പ്രാപിക്കട്ടെയെന്ന് ആശംസിച്ച് ബംഗാൾ മുഖ്യമന്ത്രി മമതാ ബാനർജി ട്വീറ്റ് ചെയ്തു. ‘ഞങ്ങളുടെ ബ്രാൻഡ് അംബാസഡർ ആയ ഷാറൂഖ് വേഗംൽ സുഖം പ്രാപിക്കട്ടെ’യെന്നാണ് മമത ബാനർജി ട്വീറ്റ് ചെയ്തത്. ശനിയാഴ്ച നടന്മാരായ കാർത്തിക് ആര്യനും അക്ഷയ് കുമാറിനും കോവിഡ് സ്ഥിരീകരിച്ചിരുന്നു.
അതേസമയം, രാജ്യത്ത് പ്രതിദിന കോവിഡ് കേസുകള്‍ വീണ്ടും നാലായിരം കടന്നു. 24 മണിക്കൂറിനിടെ 4,270 പേരാണ് കോവിഡ് രോഗികളായത്. മഹാരാഷ്ട്രയിൽ മാത്രം 1,400 കേസുകളാണ് റിപ്പോർട്ട് ചെയ്തിരിക്കുന്നത്. ഇതിൽ 961 കേസുകൾ മുംബൈയിൽ നിന്നാണ്.
രാജ്യത്ത് കോവിഡ് ബാധിച്ച് 15 പേർ മരിച്ചു. 2,619 പേര്‍ രോഗമുക്തരായി. പ്രതിദിന ടെസ്റ്റ് പോസിറ്റിവിറ്റി നിരക്ക് 1.03 ശതമാനമായി. കഴിഞ്ഞ ദിവസം പ്രതിദിന പോസിറ്റിവിറ്റി നിരക്ക് 0.89 ശതമാനമായിരുന്നു. ചികില്‍സയിലുള്ളവരുടെ എണ്ണം 24,052 ആയി ഉയര്‍ന്നു.
