ഹൈദരാബാദ്: തെലങ്കാനയില്‍ വഴിയോര ആരാധനാലയത്തിലെ വിഗ്രഹത്തിന് സമീപത്തുനിന്നും യുവാവിന്റെ ഛേദിക്കപ്പെട്ട തല കണ്ടെടുത്തു.നാല്‍ഗോണ്ട ജില്ലയിലാണ് സംഭവം. വിഗ്രഹത്തിന് കീഴില്‍ തല വെച്ചിരുന്നതിനാല്‍ നരബലിയാണെന്നാണ് പൊലീസിന്‍റെ സംശയം. 30നോടടുത്ത് പ്രായമുള്ളയാളാണ് കൊല്ലപ്പെട്ടതെന്ന് പൊലീസ് പറഞ്ഞു. കൊല്ലപ്പെട്ടയാളെ കണ്ടെത്തുന്നതിനും കേസ് അന്വേഷണത്തിനുമായി എട്ടംഗ പൊലീസ് സംഘത്തെ നിയോഗിച്ചു.
നരബലിയുടെ ഭാഗമായി മറ്റെവിടെയെങ്കിലും വെച്ച്‌ യുവാവിനെ കൊലപ്പെടുത്തിയ ശേഷം തല വിഗ്രഹത്തിന്‍റെ കാല്‍ക്കല്‍ കൊണ്ടുവെച്ചതാകാമെന്നും പൊലീസ് സംശയിക്കുന്നു. യുവാവിന്റെ ശരീരഭാഗം പൊലീസിന് കണ്ടെത്താന്‍ കഴിഞ്ഞിട്ടില്ല. പ്രദേശത്തെ സി.സി.ടി.വികള്‍ പരിശോധിച്ച്‌ വരികയാണ്.
വിഗ്രഹത്തിന്‍റെ കാല്‍ക്കല്‍ വെച്ചിരുന്ന തലയുടെ ഞെട്ടിക്കുന്ന ചിത്രങ്ങള്‍ സമൂഹമാധ്യമങ്ങളില്‍ വന്‍ തോതില്‍ പ്രചരിക്കുന്നുണ്ട്. യുവാവിനെ തിരിച്ചറിയാന്‍ മുഖത്തിന്‍റെ ചിത്രങ്ങള്‍ പൊലീസ് പുറത്തുവിട്ടിരുന്നു. സമീപത്തെ സൂര്യപേട്ടയിലെ ഒരു കുടുംബം പൊലീസുമായി ബന്ധപ്പെട്ടിരുന്നു. രണ്ടുവര്‍ഷം മുമ്ബ് വീടുവിട്ടുപോയ 30വയസായ മാനസിക പ്രശ്നങ്ങളുള്ള മകനുമായി സാദൃശ്യമുള്ളതായി തോന്നുന്നുവെന്ന് അറിയിച്ചാണ് കുടുംബം പൊലീസിനെ സമീപിച്ചത്.
വഴിയരികിലെ ആരാധനാലയത്തിലുണ്ടായിരുന്ന ഒരു പുരോഹിതനാണ് വിഗ്രഹത്തിന് കീഴില്‍ വെട്ടിയെടുത്ത തല ആദ്യം കണ്ടത്. തുടര്‍ന്ന് ഇദ്ദേഹം പൊലീസിനെ വിവരം അറിയിക്കുകയായിരുന്നു. പൊലീസ് സംഭവ സ്ഥലത്തെത്തി പരിശോധന നടത്തുകയും കൊലപാതക കേസ് രജിസ്റ്റര്‍ ചെയ്യുകയും ചെയ്തു.
