ലഖ്നോ: സി.എ.എ പ്രക്ഷോഭവുമായി ബന്ധപ്പെട്ട് എ.ഐ.എം.ഐ.എം നേതാവ് അസദുദ്ദീന് ഉവൈസിക്ക് മുന്നറിയിപ്പ് നല്കി യു.പി മുഖ്യമന്ത്രി യോഗി ആദിത്യനാഥ്. സി.എ.എ പ്രതിഷേധവുമായി ഇനിയും തെരുവിലിറങ്ങിയാല് കടുത്ത നടപടിയുണ്ടാവുമെന്നാണ് യോഗിയുടെ മുന്നറിയിപ്പ്.സി.എ.എയുടെ പേരില് വികാരം ഇളക്കിവിടാന് ആരെങ്കിലും ശ്രമിച്ചാല് അത് എങ്ങനെ നേരിടണമെന്ന് സര്ക്കാറിന് അറിയാമെന്നാണ് യോഗി പ്രഖ്യാപിച്ചത് .
ഉവൈസി സമാജ്വാദി പാര്ട്ടിയുടെ ഏജന്റായാണ് പ്രവര്ത്തിക്കുന്നതെന്ന് എല്ലാവര്ക്കും അറിയാം. സംസ്ഥാനത്ത് വികാരങ്ങള് ഇളക്കിവിടാനാണ് ചിലരുടെ ശ്രമം. കലാപകാരികളെ ഒരിക്കലും സര്ക്കാര് സംരക്ഷിക്കില്ല. അവരുടെ നെഞ്ചിലൂടെ ബുള്ഡോസര് കയറ്റുമെന്നും യോഗി ആദിത്യനാഥ് അഭിപായപ്പെട്ടു .
ഉത്തര്പ്രദേശിലെ കാണ്പൂരില് ബി.ജെ.പിയുടെ ബൂത്തുതല കണ്വെന്ഷനില് സംസാരിക്കുകയായിരുന്നു മുഖ്യമന്ത്രി . പൗരത്വ ഭേദഗതി നിയമം പിന്വലിക്കണമെന്ന് കേന്ദ്രത്തോട് അസദുദ്ദീന് ഉവൈസി ആവശ്യപ്പെട്ടിരുന്നു. ഇത് അംഗീകരിച്ചില്ലെങ്കില് മറ്റൊരു ഷഹീന്ബാഗ് യു.പിയില് പൊട്ടിപ്പുറപ്പെടുമെന്നും ഉവൈസി ഓര്മിപ്പിച്ചിരുന്നു .