തിരുവനന്തപുരം: അറബിക്കടലിലെ ന്യൂനമര്ദം കേരള തീരത്തിന് ഭീഷണിയാകില്ലെന്ന് കാലാവസ്ഥ നിരീക്ഷണ കേന്ദ്രം. ഗോവ-മഹാരാഷ്ട്ര തീരത്ത് സ്ഥിതി ചെയ്യുന്ന ന്യൂനമര്ദം പടിഞ്ഞാറ്, വടക്കുപടിഞ്ഞാറ് ദിശയില് സഞ്ചരിച്ച് അടുത്ത 48 മണിക്കൂറില് ശക്തി പ്രാപിക്കും.ബംഗാള് ഉള്ക്കടലിലെ ന്യൂനമര്ദം പടിഞ്ഞാറ് ദിശയില് സഞ്ചരിച്ച് വെള്ളിയാഴ്ച തെക്കന് ആന്ധ്രപ്രദേശ് തീരത്തെത്തും.
അതേസമയം, പത്തനംതിട്ട, കോട്ടയം, ഇടുക്കി, എറണാകുളം, തൃശൂര്, പാലക്കാട്, മലപ്പുറം, കോഴിക്കോട്, വയനാട് ജില്ലകളില് വ്യാഴാഴ്ച ശക്തമായ മഴക്ക് സാധ്യതയുണ്ട്. ഇവിടെ മഞ്ഞ അലര്ട്ട് ബാധകമാക്കി. പത്തനംതിട്ട, കോട്ടയം, എറണാകുളം, ഇടുക്കി, പാലക്കാട്, മലപ്പുറം ജില്ലകളില് വെള്ളിയാഴ്ചയും മഞ്ഞ അലര്ട്ടാണ്. മലയോര മേഖലകളില് ഒറ്റപ്പെട്ട ശക്തമായ ഇടിയോടുകൂടിയ മഴക്ക് സാധ്യതയുണ്ട്
.തെക്കുപടിഞ്ഞാറന് ബംഗാള് ഉള്ക്കടലിലും ആന്ധ്ര തീരത്തും വടക്കന് തമിഴ്നാട് തീരങ്ങളിലും മധ്യ കിഴക്കന് അറബിക്കടലിലും മഹാരാഷ്ട്ര തീരത്തും ശക്തമായ കാറ്റിന് സാധ്യതയുണ്ട്. മണിക്കൂറില് 40 മുതല് 50 കി. മീറ്റര് വരെ വേഗത്തിലും ചിലപ്പോള് 60 കി. മീറ്റര് വരെ വേഗത്തിലും കാറ്റ് വീശാം. കേരള തീരത്ത് വിഴിഞ്ഞം മുതല് കാസര്കോട് വരെ വ്യാഴാഴ്ച രാത്രി 11.30 വരെ 2.5 മുതല് 3.2 മീറ്റര് വരെ ഉയരത്തില് തിരമാലക്കും കടലാക്രമണത്തിനും സാധ്യതയുണ്ടെന്ന് ദേശീയ സമുദ്ര സ്ഥിതി പഠന ഗവേഷണ കേന്ദ്രം അറിയിച്ചു.
