കൊച്ചി: കൊച്ചിയില് ഇന്നലെ വാഹനാപകടത്തില് മരിച്ച മുന് മിസ് കേരള അന്സി കബീറിന്റെ സംസ്കാരം ഇന്ന് നടക്കും.ആലംകോട് ജുമാ മസ്ജിദിലാണ് സംസ്കാരം. മൃതദേഹം ഇന്നലെ രാത്രി കൊച്ചയില് നിന്ന് ആലംകോട് എത്തിച്ചു. അതേസമയം, അന്സിയുടെ മരണത്തെത്തുടര്ന്ന് ആത്മഹത്യക്ക് ശ്രമിച്ച അമ്മ റസീന സ്വകാര്യ ആശുപത്രിയില് ചികിത്സയിലാണ്.
ഇന്നലെ പുലര്ച്ചെ ഒരു മണിയോടെ ഫോര്ട്ട് കൊച്ചിയിലെ ഒരു പരിപാടിയില് പങ്കെടുത്ത് മടങ്ങുന്നതിനിടെ എറണാകുളം ബൈപ്പാസില് വൈറ്റിലയ്ക്ക് അടുത്താണ് അന്സിയും സുഹൃത്ത് അഞ്ജനയും സഞ്ചരിച്ചിരുന്ന കാര് അപകടത്തില്പ്പെട്ടത്. അപകട സ്ഥലത്ത് വെച്ച് തന്നെ അന്സി കബീറും, അഞ്ജന ഷാജനും മരിച്ചു.കാറിലുണ്ടായിരുന്ന മുഹമ്മദ് ആഷിഖ്, അബ്ദുള് റഹ്മാന് എന്നിവരെ ഉടന് ആശുപത്രിയിലേക്ക് മാറ്റിയിരുന്നു. വര്ഷങ്ങളായി മോഡലിംഗ് രംഗത്ത് സജീവമാണ് തിരുവനന്തപുരം സ്വദേശിനിയായ അന്സിയും തൃശ്ശൂര് സ്വദേശിനിയായ അഞ്ജനയും. തിരുവനന്തപുരം ആലങ്കോട് അബ്ദുള് കബീര് – റസീന ബിവി ദമ്ബതികളുടെ ഏക മകളാണ് അന്സി. തൃശ്ശൂര് ആളൂരിലെ എ കെ ഷാജന്റെ മകളാണ് അഞ്ജന.
അന്സിക്കൊപ്പം നിരവധി സമ്മാനങ്ങള് നേടിയിട്ടുണ്ട് ആയുര്വേദ ഡോക്ടര്കൂടിയായ അഞ്ജന. 2019ലെ മിസ് കേരള മത്സരത്തില് അന്സി ഒന്നാം സ്ഥാനവും അഞജന രണ്ടാം സ്ഥാനവും നേടി. 2021ലെ മിസ് സൗത്ത് ഇന്ത്യ ആയും അന്സി തെരഞ്ഞെടുക്കപ്പെട്ടിരുന്നു.നിരവധി പരസ്യ ചിത്രത്തിലും ഇരുവരും അഭിനയിച്ചിട്ടുണ്ട്. സൗന്ദര്യ മത്സരരംഗത്ത് കൂടുതല് നേട്ടങ്ങള് സ്വന്തമാക്കാനുള്ള തയ്യാറെടുപ്പുകളിലായിരുന്നു ഇരുവരും. ഇതിനിടെയാണ് വിധി തട്ടിയെടുത്തത്.