ന്യൂഡല്ഹി: കോവിഡിന്റെ ഒമിക്രോണ് വകഭേദം ഇന്ത്യയില് സമൂഹ വ്യാപന ഘട്ടത്തിലാണെന്നും മെട്രോ നഗരങ്ങളില് ഇത് പ്രബലമാണെന്നും ഇന്സാകോഗിന്റെ ഏറ്റവും പുതിയ ബുള്ളറ്റിന്. വിവിധ സംസ്ഥാനങ്ങളില് നിന്ന് വൈറസ് സാമ്പിളുകള് ശേഖരിച്ച് അവയുടെ ജനിതക പ്രവര്ത്തനങ്ങളെക്കുറിച്ച് പഠിക്കാന് രൂപവത്ക്കരിച്ച പത്ത് ദേശീയ ലബോറട്ടറികളുടെ കണ്സോര്ഷ്യമാമാണ് ഇന്സാകോഗ്.
ഒമിക്രോണിന്റെ സാംക്രമിക ഉപ വകഭേദമായ BA.2 ലൈനേജ് രാജ്യത്ത് ഗണ്യമായി കണ്ടെത്തിയിട്ടുണ്ടെന്നും ബുള്ളറ്റിന് പറയുന്നു. ഭൂരിഭാഗം ഒമിക്രോണ് കേസുകളും രോഗലക്ഷണങ്ങള് ഇല്ലാത്തതോ സൗമ്യമായതോ ആണെങ്കിലും ഈ ഘട്ടത്തില് ആശുപത്രി പ്രവേശനവും ഐ.സി.യു. കേസുകളും വര്ധിച്ചിട്ടുണ്ടെന്നും റിപ്പോര്ട്ട് ചൂണ്ടിക്കാട്ടുന്നു.
അതേസമയം ഒമിക്രോണിന്റെ ഭീഷണിയില് മാറ്റമൊന്നും ഇതുവരെ പ്രകടമല്ലെന്നും വ്യക്തമാക്കുന്നുണ്ട്. ഒമിക്രോണ് ഇന്ത്യയില് സമൂഹ വ്യാപനത്തിലാണ്. പുതിയ കേസുകള് ക്രമാതീതമായി വര്ധിക്കുന്ന ഒന്നിലധികം മെട്രോകളില് ഒമിക്രോണ് ആധിപത്യം സ്ഥാപിച്ചിട്ടുണ്ട്. അടുത്തിടെ റിപ്പോര്ട്ട് ചെയ്യപ്പെട്ട B.1.640.2 വകഭേദം നിരീക്ഷിച്ചു വരുന്നു.
അതിവേഗം പടരുന്നതിന്റെ തെളിവുകളൊന്നുമില്ല. പ്രതിരോധശേഷിയെ മറികടക്കാനുള്ള സവിശേഷതകളുണ്ടെങ്കിലും ഇത് നിലവില് ആശങ്കയുടെ വകഭേദമല്ല. ഇന്ത്യയില് ഇതുവരെ ഒരു കേസും കണ്ടെത്തിയിട്ടില്ലെന്നും ഇന്സാകോഗ് പറഞ്ഞു.