തിരുവനന്തപുരം: സംസ്ഥാനത്ത് 7 പേര്ക്ക് കൂടി ഒമൈക്രോണ് സ്ഥിരീകരിച്ചതായി ആരോഗ്യ മന്ത്രി വീണാ ജോര്ജ്. പത്തനംതിട്ട 4, ആലപ്പുഴ 2, തിരുവനന്തപുരം 1 എന്നിങ്ങനെയാണ് ഒമൈക്രോണ് സ്ഥിരീകരിച്ചത്. പത്തനംതിട്ട ഒമൈക്രോണ് സ്ഥിരീകരിച്ചവരില് രണ്ട് പേര് യുഎഇയില് നിന്നും, ഒരാള് അയര്ലന്ഡില് നിന്നും വന്നതാണ്. ഒരാള്ക്ക് സമ്ബര്ക്കത്തിലൂടെയാണ് ഒമൈക്രോണ് ബാധിച്ചത്.
ആലപ്പുഴയില് രോഗം സ്ഥിരീകരിച്ച ഒന്പതുവയസ്സുകാരന് ഇറ്റലിയില് നിന്നും ഒരാള് ഖത്തറില് നിന്നും വന്നതാണ്. തിരുവനന്തപുരത്ത് രോഗം സ്ഥിരീകരിച്ചയാള് ടാന്സാനിയയില് നിന്നും വന്നതാണ്. രാജീവ് ഗാന്ധി സെന്റര് ഫോര് ബയോടെക്നോളജിയില് നടത്തിയ പരിശോധനയിലാണ് ഇവര്ക്ക് ഒമിക്രോണ് സ്ഥിരീകരിച്ചത്. ഇതോടെ സംസ്ഥാനത്ത് ആകെ 64 പേര്ക്കാണ് ഒമൈക്രോണ് സ്ഥിരീകരിച്ചത്.
മൈക്രോണിന് അഞ്ചിരട്ടി വരെ വ്യാപനശേഷി; അടുത്തമാസം കോവിഡ് ബാധിതരുടെ എണ്ണം വര്ധിച്ചേക്കുമെന്ന് മുന്നറിയിപ്പ്
ജനുവരി മാസത്തില് കോവിഡ് ബാധിതരുടെ എണ്ണം വര്ധിച്ചേക്കുമെന്ന് മുന്നറിയിപ്പ്. കോവിഡ് അവലോകനസമിതിയാണ് മുന്നറിയിപ്പ് നല്കിയത്. ഒമൈക്രോണ് വകഭേദത്തിനു മൂന്നു മുതല് അഞ്ച് ഇരട്ടി വരെ വ്യാപന ശേഷി ഉള്ളതിനാല് സംസ്ഥാനത്ത് അതീവ ജാഗ്രത പുലര്ത്താനും നിര്ദേശം നല്കി.
ജനുവരി അവസാനത്തോടെ കോവിഡ് ബാധിതരുടെ എണ്ണം വര്ധിക്കാന് സാധ്യതയുണ്ട്. ഓക്സിജന് ഉല്പാദനശേഷിയുള്ള ആശുപത്രികളെല്ലാം ഓക്സിജന് ഉല്പാദനവും സംഭരണവും വര്ധിപ്പിക്കുന്നുവെന്ന് ജില്ലാ കലക്ടര്മാര് ഉറപ്പു വരുത്തണമെന്ന് മുഖ്യമന്ത്രി നിര്ദേശിച്ചു. മൂന്നാം തരംഗം ഉണ്ടായാല് വേണ്ടി വരുന്ന മരുന്നുകള്, കിടക്കകള്, സിറിഞ്ചുകള് ഉള്പ്പെടെയുള്ളവയെല്ലാം കൂടുതലായി ശേഖരിക്കും.
ഒമൈക്രോണ് കൂടുതലുള്ള തിരുവനന്തപുരം, എറണാകുളം ജില്ലകളില് കൂടുതല് ജനിതക ശ്രേണീകരണം നടത്താനും കലക്ടര്മാര്ക്ക് മുഖ്യമന്ത്രി നിര്ദേശം നല്കി. സംസ്ഥാനത്ത് 98% ആളുകള് ആദ്യ ഡോസും 77% രണ്ടു ഡോസും വാക്സീന് സ്വീകരിച്ചിട്ടുണ്ട്. രണ്ടാം ഡോസ് വാക്സിനേഷന് എത്രയും വേഗം പൂര്ത്തീകരിക്കാനും മുഖ്യമന്ത്രി നിര്ദേശിച്ചു.
രോഗപ്രതിരോധശേഷി വര്ധിപ്പിക്കാനുള്ള ആയുര്വേദ / ഹോമിയോ മരുന്നുകള് പൊതുജനങ്ങള്ക്ക് സൗജന്യമായി വിതരണം ചെയ്യാന് ആരോഗ്യവകുപ്പ് നടപടി സ്വീകരിക്കും. എസ്എസ്എല്സി, പ്ലസ്ടു പരീക്ഷയുമായി ബന്ധപ്പെട്ട വിഷയങ്ങള് ചര്ച്ച ചെയ്യുന്നതിനായി മന്ത്രി വി ശിവന്കുട്ടി, ചീഫ് സെക്രട്ടറി, ബന്ധപ്പെട്ട സെക്രട്ടറിമാര് എന്നിവരുടെ യോഗം മുഖ്യമന്ത്രിയുടെ അധ്യക്ഷതയില് ചേരാനും തീരുമാനിച്ചിട്ടുണ്ട്.