തിരുവനന്തപുരം: എയ്ഡഡ് കോളജുകളില്‍ ജോലിഭാരം 16 മണിക്കൂറില്‍ കുറവുള്ള അധ്യാപക തസ്തികകളിലേക്കുള്ള സ്ഥലം മാറ്റം സര്‍ക്കാര്‍ തടഞ്ഞു.
ഒന്നില്‍കൂടുതല്‍ കോളജുകളുള്ള കോര്‍പറേറ്റ് മാനേജ്മെന്‍റുകള്‍ക്ക് കീഴിലുള്ള കോളജുകളിലാണ് ജോലിഭാരം കുറവുള്ള തസ്തികകളിലേക്ക് സ്ഥലംമാറ്റം നല്‍കിയിരുന്നത്. 16 മണിക്കൂറില്‍ താഴെ േജാലിഭാരമുള്ള തസ്തികകളിലേക്കുള്ള നിയമനവും സ്ഥലംമാറ്റവും 2020 ഡിസംബര്‍ 30നു പുറപ്പെടുവിച്ച ഉത്തരവിലൂടെ സര്‍ക്കാര്‍ വിലക്കിയിരുന്നു.
എന്നാല്‍, സര്‍വകലാശാല ചട്ടങ്ങളില്‍ എയ്ഡഡ് കോളജുകളിലെ സ്ഥലംമാറ്റത്തിന് വ്യവസ്ഥ നിലനില്‍ക്കുന്നുണ്ട്. ഇതുപ്രകാരം മാനേജ്മെന്‍റുകള്‍ സ്ഥലംമാറ്റം നടത്തുകയും ചെയ്തിരുന്നു. ഇൗ സ്ഥലംമാറ്റ ഉത്തരവുകള്‍ റദ്ദ് ചെയ്ത് അധ്യാപകരെ മാതൃസ്ഥാപനങ്ങളിലേക്ക് മടക്കി അയക്കാന്‍ നേരത്തേ കോളജ് വിദ്യാഭ്യാസ ഡയറക്ടര്‍ നിര്‍ദേശിച്ചിരുന്നു.
ഇതു നിലവിലുള്ള അധ്യാപകരുടെ ശമ്ബളം തടയുന്ന അവസ്ഥയുണ്ടാക്കുകയും ചെയ്തിരുന്നു. സര്‍വകലാശാല ചട്ടത്തില്‍ സര്‍ക്കാര്‍ ഇറക്കിയ ഉത്തരവിനുവിരുദ്ധമായ വ്യവസ്ഥ നിലവിലുള്ള സാഹചര്യത്തില്‍ പ്രശ്നം പരിശോധിക്കാന്‍ പ്രത്യേകം കമ്മിറ്റിയെ നിയോഗിക്കുന്നത് സര്‍ക്കാറിെന്‍റ പരിഗണനയിലാണ്. ഇക്കാര്യത്തില്‍ തീരുമാനം ഉണ്ടാകുന്നതുവരെ നിലവിലുള്ള അവസ്ഥ നിലനിര്‍ത്താനും നടത്തിക്കഴിഞ്ഞ സ്ഥലംമാറ്റങ്ങള്‍ റദ്ദ് ചെയ്യാതെ നിലനിര്‍ത്തിക്കൊണ്ട് മറ്റൊരു ഉത്തരവ് ഉണ്ടാകുന്നതുവരെ പുതിയ സ്ഥലംമാറ്റങ്ങള്‍ നിര്‍ത്തിവെക്കാനും സര്‍ക്കാര്‍ നിര്‍ദേശത്തില്‍ പറയുന്നു. പി.ജി ക്ലാസുകളിലെ അധ്യയനത്തിന് ഒരു മണിക്കൂര്‍ ഒന്നര മണിക്കൂര്‍ േജാലി ഭാരമായി പരിഗണിക്കുന്ന വെയിറ്റേജ് നിര്‍ത്തലാക്കിയതോടെ പല തസ്തികകളിലും ജോലി ഭാരം 16 മണിക്കൂറില്‍ താഴെയായിരുന്നു.
